TVB主持任晚宴司仪被批惹失言争议　认经济差工作跌3成

陆浩明（6号）早前为周大福人寿举办的周年颁奖典礼晚宴上，多次提及竞争对手名称，甚至无端端讲TVB有咩好，又自称“镜粉”，其“灾难式”表现遭网民撰长文狠批：“如果你知道呢条友做主持有几咁失败，你绝对唔敢揾佢做主持。日前其早几日我个保险agent约咗我去周大福人寿食饭，呢条友做主持，开口埋口就苏黎世，你系咪有病㗎，苏黎世系隔离保险公司，你喺周大福人寿嘅地头，系咁讲隔离保险公司个名，系咁讲苏黎世几好，我知道佢讲紧瑞士苏黎世，但系都要避忌下啦。”事件引起网上热话。

今日（5/7）陆浩明出席新城电台节目宣传活动，就事件接受《香港01》访问时表示：“其实𠮶件事我已经喺佢出Po𠮶度留咗言澄清咗，好多人都好信我，大家都知我做咗咁耐信我就ok啦。（事件对你有冇影响？）都ok嘅，同埋工作一直都安排紧，好彩仲有啲保险客户都有继续揾我。（揾你𠮶啲客户有冇提你小心啲唔好再乱讲嘢？）咁又冇，因为我就唔会乱讲，都系跟稿读。不过明白总有啲入嚟睇嘅观众钟意，亦会有啲观众唔钟意，咁所以我就冇乜所谓嘅。”

问到会否因为这件事相反带来更加多工作？陆浩明表示：“其实又差唔多，不过讲真而家我哋做嘢嘅市况的而且确系冇咁好嘅，因为大家都知香港嘅经济，令好多餐厅都执咗，亦有好多大型品牌又结业，希望跟住会好啲。（工作量减少几多成？）如果比起以前，比起疫情之前起码少咗两至三成，同埋好多公司budget又会少咗，相对我哋嘅酬金又会变少咗，我而家好钟意做嘢，咩价钱都得㗎。”