卢冠廷最后一次红馆开骚　曾心淡退出：300万制作费卖得万五张

今年踏入75岁的卢冠廷(LoLo)将于6月21日及22日举行红馆两场《MY MUSIC‧MY LIFE 一生所爱》演唱会，他为第4度登上红馆以及最新派台歌《陪著我走》接受雷霆881商业一台《星光背后》专访。谈及事隔9年才申请到红馆档期，LoLo不讳言今次将会是他最后一次红馆个唱，“肯定今次系最后一次！你计吓数，9年后我84岁啦，唔好搞啦！休息下好过。”节目中，LoLo除了分享与填词人太太唐书琛相依相伴半世纪的秘诀外，亦回顾了其音乐历程，他最引以为傲作的作曲作品是苏芮89年主唱的《凭著爱》。此外，LoLo于91年曾心淡退出乐坛，原因跟当年他与台湾音乐大师李宗盛合作所推出的专辑有关，“300万制作费，卖得万五张！”

卢冠廷透露这次最后红馆骚将会选唱自己过往为他人创作的经典金曲，当中包括张学友的《天变地变情不变》、张国荣的《你在何地》及罗文的《朋友一个》等等。而谈及自己最爱的作品，他笃定地说是89年电影《群龙戏凤》的主题曲——《凭著爱》，“《凭著爱》系经典到不得了！点解呢只歌咁巴闭？当时香港歌手大部份都改编台湾或日本歌，但《凭著爱》一出，台湾姜育恒将佢改成《再回首》，系第一次！之后《再回首》响春晚成七亿人听，首歌虽然唔系我唱，但作为作曲人去生出呢个艺术品，系好开心！更劲嘅系王家卫《繁花》拣咗六十只歌，全部都播一次就算，唯独《再回首》repeat五、六次，系经典过经典！”

LoLo更披露能够作出《凭著爱》的旋律，其实亦归功于该电影的编剧——卢坚，“当时洪金宝导演唔睇音乐，叫卢坚睇住我啲音乐。我听咗故事作主题曲，头𠮶几句主曲已经作起，但副歌𠮶段作极都唔match。卢坚啲taste正，好多次都话副歌唔合格，迫咗我改唔知几多次。作到而家版本嘅副歌，佢终于话正呀！呢首歌能够攞奖，都系因为卢坚迫我！响度要多谢佢。”

1991年，卢冠廷更杀入台湾巿场与音乐大师李宗盛合作“半国语半粤语”专辑《我(们)就是这样》，不过自此专辑后LoLo至2015年复出前也再没推出个人唱片，LoLo说：“同李宗盛本来‘无啦更’，系张艾嘉畀咗我啲碟佢听，佢觉得我唔错。咁啱当时滚石又想进军香港，就飞嚟香港同我倾合作呢只碟。”谈及作给对方唱国语然后自己唱广东话，“我国语唔得，佢广东话唔得，一定系咁做，之前无人试过！本来一人作五首，点知佢又忙到净系作到两首，搞到我要作埋其他。”

LoLo坦承当时对这张专辑的期望很大，“我、我太太同李宗盛都将最好嘅嘢放晒落呢张碟，期望肯定大。李宗盛话用咗300万，净系录音都95万，但响香港只卖得万五张。虽然李宗盛话随时可以出第二张，但我唔想再蚀晒人啲钱！之后我系唔再出碟，唔想嘥人钱！都已经唱咗十年，咪算啰！”LoLo否认当年是创作瓶颈位，“唔系我创作瓶颈，而系个巿场唔接受你，你识飞天都无用！咪做有人接受你𠮶啲，咪继续做电影配乐啰！”

卢冠廷坦言若非2015年环球唱片邀请他复出、灌唱片及开骚，他也不会再有出歌出碟的大计。他指多年来的版税收入及西贡开设了18年的绿色商店，已足够他夫妻生活，“版税OK㗎！养咗我哋几十年。间舖生意都好，同样养咗我哋18年。更好运系社运之前，有人买咗我哋间铺，咁就一身松晒！”