75岁两亿富婆与细17年男友复合　少女心甜到漏表白：希望爱是永恒

现年75岁的薛家燕因前夫石保庆有第三者，1995年决定离婚，独力养大三子女。薛家燕在2018年承认有一位拍拖12年的男朋友“A君”Andy，但对方比自己细17年，令薛家燕一直好介怀，担心姊弟恋难走到终老，更一度分手，直至早前接受卫诗雅访问时才漏口风表示已经复合。日前薛家燕接受陈志云访问，更公开讲爱的宣言，一副少女心表示：“希望我哋呢个爱系永恒嘅。”

薛家燕接受陈志云的网上频道“最紧要健康”访问，有传闻家燕姐身家2亿，提到身后事及财产分配问题，家燕姐表示不担心，因为子女好乖每月都有给家用，笑说：“我话唔使，但系佢哋心意，我都多谢同感恩。”反而，家燕姐好在乎现在的另一半，她说：“我谂紧恋情......我大佢十几年，初初唔敢接受，因我太佢咁多，系咪一时钟意迟啲未必钟意呢？佢有好多选择，但咁多年都对我咁好，有一晚唔记得话佢听‘Goodnite，see u in my dream’，佢就觉得点解今日冇咗你声音。”

家燕姐透露子女已经好接受“A君”，全家人去旅行都会预埋对方，家燕姐说：“我心挂住一样嘢，我年纪比佢大，我可能比佢早走，如果普通夫妇差唔多年纪，走都系差一两年，但我哋差十几年，所以我谂样嘢。我有同我大女讲，阿珊话唔紧要，enjoy你现在呢个moment，你都唔好谂咁多。”

陈志云亦有安慰家燕姐，表示若能先离世是一种福份，相信对方亦不会介意负起照顾她的责任。家燕姐透露二人是经朋友介绍下认识，“A君”在内地经营餐馆，被问到如何再次打动家燕姐令二人复合？家燕姐怕怕羞羞说：“我好耐冇覆佢，佢好失落，我话不如算，我好忙，不如你识第二个女仔，佢就写几个字，你咁令我‘肝肠寸断’，哎呀，我好难过呀当时，sorry ，咁佢可以识好多女仔嘛。”陈志云插嘴表示：“你好少女呀撞鬼，哪个少女不多情？”

最后二人再次走在一起，但薛家燕拒绝求婚，她说：“我同佢讲我离过一次婚，好怕再结婚，唔使成日催，我都唔会生仔女，我食静心，哈哈，佢屋企人有乜可能催啦，以为生下一代，我都冇得生，哈哈。”

在陈志云要求下，薛家燕对着镜头向“A君”讲爱的宣言：“我好多谢你一直以嚟咁爱锡我、体谅我、照顾我，我觉人生去到我呢个年纪，有咁甜蜜时光好难得。你成日话我似细过你，其实我真系一个大细路，你比我成熟好多，所以好多时我有困难你帮我分忧、帮我。我人生呢段时间认识到你系我嘅福气，希望我哋继续甜甜蜜蜜。”家燕姐在对方心目中是大细路，直言现在最重要健康，及珍惜彼此的爱，续说：“希望我哋呢个爱系永恒嘅。正如我一直担心我年纪比你大，陪你日子不咁多，你有提我唔好咁多工作，珍惜一齐时间，呢个我哋人生宝贵嘅时间，我会记喺心里头，thank you你。”