鲁振顺爆初恋隐瞒堕胎分手时曾自杀：如果留返个仔今年40岁喇
1979年透过艺训班入行的鲁振顺，现年67岁，曾两度（1983年及1996年）离开TVB。1998年第三度“返娘家”至今，凭精湛演技被誉为“绿叶王”。今年年中便约满的鲁振顺接受雷霆881商业台《星光背后》专访，忆述前半生事业感情也受尽打击。而对于因演活《笑傲江湖》的东方不败而长年被误会其性取向，他自爆：“阿妈都怀疑过我，我话畀你知，我第一个女人年纪大过我兼同我一齐七年，佢走去堕胎我都唔知。如果佢留返个仔，我个仔今年40岁喇。”
回望半生，鲁振顺坦言人生首两次打击也跟错失男主角机会有关。“人生第一个打击系电影《边缘人》，导演章国明最初揾我，仲叫我去练大只，但最后因为艾迪系某啲人契仔所以被换角。”第二次则是1983年周润发与梁朝伟合作的剧集《北斗双雄》，最初卡士原是鲁振顺伙拍发哥，“《北斗双雄》我已经试咗戏，监制仲叫我练咗三个月瑜伽。去到第一日开工，导演先话我个角色变咗。”先后被艾迪及梁朝伟取代机会，鲁振顺并没对二人埋怨：“伟仔低我两届，同佢唔熟。我同任何人都咁讲，艾迪同伟仔做到嘅效果，换咗我鲁振顺未必有呢个成绩呢。但对于当时我作为一个新人来讲，系好大打击，你畀咗希望我又打沉我。”
鲁振顺1996年首次回巢，凭“东方不败”一角获金庸点赞，成为其代表作。不过，他亦因此长期遭人误解他的性取向，“大把人怀疑我，阿妈都怀疑过我啦，唔通我逐个解释？我讲畀你听，我第一个女人老过我，佢大我七年。𠮶时佢肥咗，瞒住我走咗去深圳堕胎。当时我好戆居又笨，如果佢留返个BB仔，我个仔今年40岁喇。”
他坦言1987年割腕自杀的原因亦与这位女朋友分手有关，“系其中一个因素，之前因为帮堂姊拍电影《天王巨星》争人200万，无颜面见屋企人。当时我希望有家庭，但𠮶位女士突然又话同我唔啱，咁你又同我七年？你玩我呀！另外，发觉呢行好身不由己，当时签咗亚视，𠮶出剧《香港情》我得五集，但拍好耐。等一个演员甄楚倩，等六个钟！到拍完以为脱苦海，当晚我饮大咗，又突然收电话要第二日补拍一个镜头，我就答我死咗喇！”
自杀获救后，鲁振顺称交往过一个四川来港的女友；然后1989至1995年往台湾发展，亦有过一段异地恋；及至1995年回港照顾年迈母亲至她2017年辞世，他的真命天女，即现在的伴侣Julie才于2019年出现。至于为何曾计划2022年结婚最后又取消，鲁振顺说：“最初因为疫情，好在仲未畀几十万订金。其次我哋无仔女，无需一纸婚书，都唔会斋注册啦。佢又有钱我又有钱，费事烦，费事觉得我谋佢或者佢谋我。”