游学修大爆“试当真”10月停运真相 竟然同呢样嘢有关

由游学修、许贤、苏致豪创立的 YouTube 频道“试当真”在4月1日愚人节，无预警宣布将于今年10月26日、亦即5周年当日停止运作，事件惹起网上关注。

游学修今日（29/4）现身西贡出席运动会，就事件接受《香港01》访问时表示：“点解有咁嘅决定，系因为唔想做，觉得自己唔识做老细，我想专心做返演员同创作嘅嘢，做老细系一件好困难嘅事嚟，亦觉得唔系我擅长嘅事。（系咪对住员工好激气？）唔关员工事，纯粹系自己唔系做老细嘅材料。（5年嘅心血！）系，咁所以要好头好尾，更加想同大家做好个尾，光荣结束。（结束平台呢个决定谂咗几耐？）其实我哋都谂咗几年，虽然做咗5年，但其实都谂咗4年，一直都谂几时结束，但近排又谂又觉得几好，就决定结束。（资金问题？）其实之前都回应过，你就当系，我讲唔系又冇乜意思。（你话唔系资金问题都冇人信！）系，系，系资金好大问题。”