电影金像奖｜卫诗雅头痛难落手拣战衣 ：有良家妇女款

卫诗雅（Michelle）今日（24/4）现身尖沙咀出席“全港戏院日2025”活动。Michelle接受《香港01》访问时透露，在求学时期曾应征过戏院售票员，但最终落空：“寻晚知道今日要做呢个活动，令我突然谂起我人生第一份见嘅工作，话说系去戏院见工，但好可惜佢哋系冇请到我，我系伤心咗一段时间。”

Michelle续说：“点解我会想去见呢份工，系因为我想可能免费睇戏，同埋可以食爆谷，咁所以我先走去见。（睇戏遇到有人玩手机，发出食嘢声会点处理？）我系鹌鹑咁唔敢出声，然之后自己会喺度发悯憎。不过我试过有次，我系好后悔买咗爆谷入场，因为𠮶套戏故事讲一发出声音，只怪物就会出现。当时现场太静，我系冇可能咬爆谷，我只系含住个爆谷，然后就吞落肚。咁所以大家入场前就要了解套电影适唔适合先好买爆谷。”

被问到金像奖战衣选定未？Michelle笑言：“其实我已经试咗几套，因为同事都有唔同嘅意见，变咗要等听日先决定要边套。（有边几款衫？）有女神款啦，高贵大方款啦，仲有良家妇女款啦，哈哈，仲有一个野性嘅嘅款，前面系开叉到肚脐位置，心口系会冷亲。（老公陪行红地毡？）佢会呀，呢几日心情都好放松，系好期待𠮶一日。”