郑中基若畀8千赡养费合理吗？律师：有责任维持对方原有生活水平

郑中基（Ronald）与余思敏（Sammie）结婚13年，早前惊传离婚消息，两夫妇已在社交平台取消关注对方，郑中基更被影到现身家事法庭，疑为离婚事宜及子女抚养权循法律途径解决。4月22日，有传媒爆出离婚内幕，指郑中基有传为了争赢一对子女的抚养权，每月仅愿付8,000元赡养费，余思敏觉得出手太低，根本不够应付小朋友的学费、兴趣班与日常开支，于是闹上法庭。

郑中基出身富裕家庭，父亲郑东汉是唱片业界前高层，他亦有“太子基”之称，现居老牌豪宅阳明山庄，加上在音乐、电影圈都有超凡成绩，到底有冇可能只畀$8,000赡养费呢？《01娱乐》就此咨询大律师陆伟雄意见，讲到郑中基早前现身家事法庭，他认为很难一概而论个中原因，但一定是与婚姻上的纷争有关，简单而言是有嘢“倾唔掂数”，例如离婚理由、子女抚养权、赡养费数目等未能达成共识。反之若双方早已就离婚达成共识，没有争论，则可豁免出席家事法庭的需要性，但仍要上庭：“中止一段婚姻，要由法庭颁令至可以法律上成立，所以简单嚟讲，一定要上法庭，但系有时如果大家双方都同意，咁就可以豁免，唔需要上家事法庭都得。”

讲到法庭对于赡养费判决，一般是畀有需要的一方；至于法庭通常有什么考虑因素，除了畀赡养费一方的收入，亦要视乎支出，因为有人可能月入十万，但开支原来十一万，所以都冇能力畀多赡养费；不过在审讯过程，畀赡养费一方要如实申报自己的资产、收入和开支：“要如实申报，如果佢有隐瞒，日后要发假誓或者好多嘢要追究，或者去到法庭咪会输官司。”有些人会在部署离婚期间转移资产，或故意不工作，到离婚时以冇钱为由，意图减少要付的赡养费数目，不过法庭会检视此人近年所有家产：“我举例，如果你屋企有楼，个法官话虽然你而家冇嘢做，你有楼㖞，咁你卖咗层楼，𠮶层楼可能有3,000万㗎嘛，你要分返一半畀人。如果有证据显示喺离婚之前两年内你将啲物业转售，我哋会攞返所有嘅数出嚟计数。”

陆伟雄大律师又指：“假设男方话畀$8,000，可能话经济唔好、收入唔稳定，冇能力畀多；但亦都要睇埋女方，究竟子女归属边个先？如果我要咗细路仔，理论上我要供书教学㗎嘛，要畀地方佢住，你畀$8,000唔够畀女方去养育子女啰。”他说，法庭判赡养费时，畀赡养费一方有责任维持另一方的生活水平：“举个例，我离婚之前有两个工人，你要维持返两个工人𠮶个生活水平同方式畀我，或者我有司机，你咪畀返个司机我啰。如果我系住山顶，你要畀返同级嘅居住环境畀我，唔能够㧬我去深水埗㓥房或者去由得我瞓街。”他不能评论到底8,000元赡养费是否合理，但就以香港生活水平客观来说，8,000元养一个人十分勉强。另有传媒报道指，余思敏决心离婚是因为郑中基与前经理人仍未“斩缆”，虽然不能证实消息，不过陆伟雄大律师仅从过往接触过的案例而言，指出出轨行为对赡养费数目影响不大。

至于抚养权方面，法庭会按小朋友最大福祉去作出裁决，他表示：“我哋通常系唔想改变小朋友现时享有嘅生活模式，原来妈妈不嬲都系做家庭主妇，照顾两个小朋友，爸爸系出去揾钱，揾完钱之后就准时畀家用，咁喺呢一个成长过程当中，都系妈妈落手落脚去凑大小朋友，教佢做功课、带佢返学、讲故仔……简单嚟讲除非有啲好重大嘅改变，否则都系会用返呢个模式，妈妈照顾就归妈妈。”法庭会要求双方各做一个誓章，列出结婚而来的生活模式、与子女的相处情况等，虽然双方多数各执一词，但实际就交由法官裁决到底哪方较可信；而如果子女未成年，其意愿虽有参考价值，但实际判决仍是以法庭判定谁可以提供到最大福祉给子女为依归。

问到是否照顾者一方就必然有利，陆伟雄大律师说：“系，当然要睇埋背景，我哋一定会判畀一个人，系长时间可以提供到一个照顾嘅功能。如果爸爸要返工揾食，爸爸攞个仔返嚟都冇时间照顾嘅，话‘我咪请工人啰。’你做法官都唔会咁样判咗畀爸爸𠮶边。”而他亦纠正一个观念，赡养费只是一个统称，一对夫妇没有生小朋友，都一样要畀赡养费；而畀小朋友的，是叠加上去的生活费。他续说：“你畀咗生活费小朋友供书教学，唔使讲啦，跟住个妈妈仲要陪伴小朋友，佢要付出㗎嘛，简单嚟讲，佢个生活费仲要加返妈妈要付出𠮶个责任，都要补偿返畀佢。佢本来可以出去揾食，出去赚钱，而家佢继续要照顾两个小朋友直至佢成年，佢付出咗，你金钱上咪要补返佢个损失。”

此外，赡养费金额与结婚年期亦成正比，“如果妈妈冇做嘢又要照顾小朋友，佢嫁咗畀你突然间就要同佢离婚，令到佢脱咗节，而家即使出嚟做嘢，都揾唔返旧阵时揾到嘅钱，咁离婚一定要弥补返你所有损失。所以有一个好重要嘅考虑因素，系你结婚嘅长短，结咗婚三个月，离婚嘅话得到好少㗎咋，但系如果结咗婚，我同你30年，得到嘅赡养费咪多啲。”