颜米羔被公开追债　推翻比赛后冇收过粮之说：冇讲过无线冇出粮

颜米羔凭无线节目《中年好声音2》夺得季军后工作不断，人气火速爆升。早前有位网名叫 “leo71287”的人，趁颜米羔44岁生日，公开在threads追数“赠兴”，贴出多张与颜米羔私讯的对话截图，力证颜米羔玩失踪兼唔还钱。

颜米羔最终不敌压力现身留言回应：“兄弟，其实我由上年到而家都无工作收入，得啲好散嘅Job仔维持住，叫做好彩无咩要特别洗钱。比赛完到而家都未收到公司一蚊粮，生活精彩，但未有落袋。”事后颜米羔偿清欠款给对方，事件圆满解决。

颜米羔今晚（9/4）现身湾仔出席《好在有朋友》慈善音乐会，就事件接受《香港01》访问时表示：“其实新闻就冇分负唔负面，但感恩大家嘅关注。（事件会唔会令你唔开心？）唔会唔开心，有时朝早冇食早餐都会唔开心嘅，咁所以开唔开心都系之前嘅事，但今日我好开心。（事件已经解决晒？）已经解决晒先俾你哋报啦。总之都多谢大家嘅关注。同埋行得出嚟幕前，系要管理好晒自己所有嘢，而今次都系上咗宝贵嘅一课。（无线而家有出粮俾你？）其实我冇讲过无线冇出粮俾我，只系喺当时发生𠮶阵时，我系冇，呢个系事实，当时又真系未有。”