专访｜江华曾因病身心崩溃　见识自己脆弱重新学做人：我唔系好人

江华于大约2004年左右离开了TVB，而没多久之后，他迎来了人生谷底，突然腰间盘突出，三年间瞓唔到、企唔到、坐唔到，痛楚完全将他的身体及精神状态逼疯，那种痛超越了所能承受的，他甚至连想跟自己说一句“振作”都不能，亦彻彻底底知道自己其实相当脆弱。
经历过病痛及抑郁边缘，他领悟到何谓珍惜当下，也开始反思自己过去嘅角色：做演员、做丈夫、做父亲、做儿子等等，江华认为自己全部都做得不好。他年轻时曾冷落老婆，甚至不爱回家，但太太麦洁文三十年来始终不离不弃，他感谢太太的智慧与能耐：“如果佢系一般普普通通嘅女子，我哋其实离咗婚，一定离咗婚！”年过40岁后，江华重新开始学做人，也重新学识什么是爱，也不再羞于表达，更在访问中剖白爱的宣言。
场地：花图

腰痛困扰三年身心陷崩溃　意识到自己渺小

上一篇访问讲到江华拍完《楚汉骄雄》就离开了TVB，大约一、两年后，他与舒淇、霍建华等拍摄内地电影《风尘三侠之红拂女》期间，健康却亮起红灯。他在床上做仰卧起坐期间，腰部突然剧痛，一痛，便是三年，更是超乎常人能接受的身心折磨。他忆述：“以为扭一扭，原来佢（腰椎）L4至L5中间个软骨已经出咗嚟，砸到神经线，一砸就三年喇。𠮶阵时搞到成个人又瘦晒，又精神恍惚，因为我哋习惯咗好多嘢自己处理，你突然之间发觉你乜嘢都处理唔到㖞，原来人一脆弱起上嚟系可以咁脆弱㖞，𠮶刹那你会有好多恐惧，你会好惊。”他当时时不能坐、不能睡、不能站，任何姿势都不舒服，连想一觉瞓天光都仿如痴心妄想，非常痛苦，他坦言过往拍戏都不时受伤，自己承受痛楚的能力不低，而这一种痛却是超出了他能承受的范围。

持续疼痛之下，江华终于去求医，得悉病情后最关心的当然是怎样才会痊愈，他直指医生的回答相当攞命：“佢话拉腰、打针、做手术，三样嘢，三个选择畀你，但系佢最后尾讲𠮶句先系最攞命，佢讲完呢三句之后，‘嗱咁样，你做晒都好啦，都唔一定好㗎！’”没有终点的治疗，仿如无间地狱一样，把江华的心理状况直推至深渊，非常无助。他虽然没有睇精神科或服食相关药物，但整个人显然已是抑郁，“已经系崩溃咗，成日心慌慌，呢样又惊𠮶样又惊，总言之你系冇办法，你系冇谂过一个人会系咁㗎！我哋由拍戏到出道到而家，乜都靠自己，你点样攻击我咩？得，唔紧要，我搞掂你，我做好我嘅戏；未有人识咩？我努力，做到有人识，乜都自己嚟㗎嘛，系得㗎嘛，系咪先？我唔怕辛苦，嚟啦！但系𠮶个情况底下，你系乜嘢都唔得，坐唔得企唔得瞓唔得，咁你仲有乜嘢？你仲可以点？唔系我话‘我振作！’就得，我唔得呢，系已经唔能够去控制自己。”

尽管医生说试尽三个方法都未必能断尾，但江华最终选择打针，问到原因，他说：“咪信咗耶稣啰，听到‘你去打针啦’咁样。”终于痊愈甩难，他表示自己不知何谓信仰，甚至有人可能觉得只是幻觉，但那个时刻他确实感觉耶稣拯救了自己，他会记一世。经此一役，江华整个人生观都出现了翻天地覆的变化，“珍惜当下”听来是陈腔滥调，但有了这次的经历，他大切大悟出这个道理，同时发觉自己的渺小。他表示：“人其实系冇几巴闭，系冇几叻，你可以好叻，可以好巴闭，但系可以一下子就将你全部嘅嘢攞走晒。”

外界有传江华无法工作那段时期，一家经济陷入困境，靠太太麦洁文教唱歌撑住头家，他笑说：“讲系咁讲啦，哈哈！𠮶啲新闻到而家都系咁讲㗎啦，即系话我食软饭，唔拍戏，要个老婆养你，如果系就好喇！”他又反问：“老实讲佢教唱歌揾得几多钱吖？如果佢能够教唱歌都可以撑起成头家嘅，恭喜你啦大佬，系咪先？冇乜所谓，咪讲啰，我哋有积蓄嘅。同埋我成日都讲，生活系可以好简单，睇吓你要求点嘅啫系咪先？咁咪OK啰。”麦洁文本身不是一个多话的人，江华被顽疾缠绕时，她其实也只是默默陪伴，没有多说什么，江华又说：“其实两个人相处最感动嘅就系一路都陪住你，一路不离不弃，结婚宣誓嘅时候都讲咗无论疾病贫富，系咪？我哋都系做返自己本分啫，履行返结婚个承诺啰，唔系有啲有问题即刻走㗎嘛。哗，你破产呀，你病呀，仲唔走呀？我成日觉得而家唔知点解啲人郁吓就离婚，我又唔系好理解，如果唔啱就离婚嘅，其实点解要结婚啫？”

换言之，即使二人结婚三十多年走过起起跌跌，江华也从来没想过离婚，而麦洁文亦曾经讲过：“我结咗婚就唔要离婚㗎喇。”江华不讳言，能与老婆结婚是一种福气，自己年轻时完全不顾家，拍戏拍到日夜颠倒，收工再去跟朋友饮酒，完全冷待老婆，“直至到唔知边一年边一月我喺度谂，饮酒点解一定要同朋友？唔可以同老婆嘅咩？唔知点解我会咁谂，咁我就开始邀请佢，我哋不如一齐出去饮杯嘢啰。所以其实，如果佢唔系一个咁有智慧、咁有能力嘅女人，其实可能就离咗婚㗎喇。”近十几年，江华常常将“学做人”挂在口边，无论演员、丈夫、父亲、儿子等等身份，他全部都要学习，自己过往可能因为无知而曾经伤害人，他直指根本自己觉得这个世上冇一个人是好人，所以需要学，“喺我哋人生里面，我哋好多时有意无意伤害咗人哋，或者做咗一啲唔应该做嘅嘢我哋都唔知，咁你有几好啫？我会话系一个学习，我学习去做一个好人，我唔系一个好人。”

而太太亦是让江华要决心学做人的动力之一，他直认以前根本不知道爱为何物，要40岁后才开始慢慢学。以前他常常丢低太太在家，但说实话，他肯定自己心底里是爱对方的，只是不知道爱要用行动表达，江华说：“我系爱佢㗎！我系真系爱佢！但系我唔知道爱系需要陪伴，我唔知道爱系需要表达关怀，我唔知、我唔识，所以有一日老婆咪问我啰，我老婆话‘我觉得你以前唔爱我。’我咪将头先呢番说话话畀佢听啰，其实我系爱佢㗎，但系我唔识吖嘛，我40岁打后我咪开始学做人啰。”讲到太太可曾问过“你爱唔爱我？”、“你系咪唔爱我？”这些女人最爱问的问题，江华斩钉截铁说：“冇！”他解释：“大前提我咪话佢系一个好有智慧嘅女人、好有能耐嘅女人，如果佢系一般普普通通嘅女子，我哋其实离咗婚，一定离咗婚！但系佢系……真系可能系命中注定啦。”

有多次机会与其他女人一起　却从未想过离婚

被问起在那些时刻觉得自己真的很爱太太，江华更非常坦白表示：“其实我有机会……我有好多次机会系可以同第二个女人一齐，好多，但系我唔会咁做，哪个少年不轻狂呢？我只可以咁样讲，但系我有个底线，我个底线就系，我一定唔会因为你而同我太太离婚㗎，你可以话我系渣男，乜都得，但系呢个就系我嘅底线，如果我唔爱佢嘅，我点会咁做呢？”爱的形式有很多种，有些男人可能会觉得“你要是爱我，就该接受我的一切，包括我会有不止一个女人”，江华听到这个假设后就非常激动说：“梗系唔会啦！大佬！唔得，呢个唔得，呢个简直系……呢个借口太差喇，你爱我就要接受？唔得……”他更叮嘱各位女性，无论多喜欢一个男偶像，都别在老公面前提起你“钟意”对方，“冇一个男人会钟意自己老婆，去钟意第二个男人，哪怕佢有几大、几宽宏嘅胸襟，除非佢唔钟意你嘅啫，因为呢个系人性，亦即系头先个道理。”

访问当日麦洁文都有在场，近年每次露面都孖公仔的二人，连做访问都同行，访问进行了两个多小时，她也默默坐在旁等候。而访问中途，讲到婚姻话题时，江华更真情剖白对太太的“爱的宣言”，他说：“我哋嘅婚姻超过30年，我哋经历咗唔多唔少嘅嘢，其实我每日见著佢嘅时候，望住佢个样，我都谂返起我识佢𠮶时个样，唔系话佢而家唔靓，而系我系……好感恩、好享受，我能够同呢一个人走过我人生嘅三十年。”他认为余生能继续相伴，已是很大很大的福气，而自己有非常强烈的决心要这样做，又讲到有次逛街突然有感而发，“有一次我同佢讲话……老婆，无端端㗎㖞，行紧街㗎咋㖞，我话‘老婆，如果人生真系有来世嘅，我愿意再同你做夫妻。’所以我好明白，我自己同呢一个人、我哋嘅感情，系去到边度，冇嘢讲啦？仲可以讲咩啫？我话‘你认唔认得我㗎，如果有来世？’佢话‘可能唔认得㗎。’哈哈！”

继续学做人　但求快乐过好每一日

相信如果是以前，江华还未开窍时，未必讲得出这番说话，证明他“学做人”的确有所修为，他认为自从学做人后，自己愈来愈开心，每一日都开心过上一日。他谓：“而家我做嘢嘅宗旨就系，开心嘅东西，我做；唔开心嘅东西，我唔做；冇得选择嘅东西，我就算唔开心都好，我都要让自己开心；有得选择嘅，我咪选择啰。”他强调人其实是“习性”动物，很多事情都是习惯成自然，他分享自己在日常生活中实行的小练习，“如果遇到一样嘢唔开心，你要改变自己嘅谂法，你将呢个唔开心嘅习惯，将佢缩短，譬如以前你一唔开心可能嬲一个月、可能嬲一年、可能嬲一世，但系你习惯将佢缩短，咁就唔同喇，我做紧㗎，系好得㗎 ！非常得㗎呢样嘢。记住，你遇到一样嘢唔开心，你就会将佢一样一路咁缩短，今次一个月，下次一个礼拜，再下次一个钟头，再下次一分钟，再下次，一秒钟你已经唔记得咗！very good！”

上篇访问中，江华已透露自己不考虑再拍剧；而淡出电视界之后，江华甚少出现在幕前，大概十年前他曾被影到转行做保险，当时是应朋友邀请，他甚至第一张保单已经是MDRT（百万圆桌），不过他做了一年就自觉不适合，因此就没再做。不过他觉得试试也无妨，至少赚到一个人生阅历，“真系做过保险，我起码知道保险系乜嘢，我起码知道保险里面有啲乜嘢污糟邋遢、有啲乜嘢干干净净。”江华去上保险堂的消息，当时很快便已曝光在报章娱乐版，伴随著的当然也有一些闲言闲语。讲到从一个知名的演员转行做保险，会否需要克服一些心理关口，或觉得自己是放下身段，江华表示：“净系Day 1你去考试已经系啦，都有好多人望住你，我觉得人生就系咁㗎啦，如果你系一个演员嘅，点解你唔可以演一个保险从业员呢？点解你唔可以啫？咁你咪当做紧戏啰，有咩问题啫。”

至于卖保险还是做演员更需要演技，江华道出一句：“人生本来就系需要演技。”在观众心中，江华肯定是一位成功的演员，但他自评自己在人生中的剧本中，是位很失败的演绎者，“喺现实生活里面，因为我唔识得点样去……简单啲讲，或者我唔系唔识、我唔喜欢去同你虚虚假假，但系如果你演技好嘅，你可以同人哋好虚假，虚假到好似真嘅一样㗎，其实冇坏㗎，大家都舒服啰。但系有一句说话系咁嘅，我自己认为‘一切嘅嘢都系你愿意与否’，总之我唔愿意，即系我唔愿意咁样。”明明成绩彪炳，江华却很快转行，大抵也是差不多原因，他坦言自己不是“那种人”，亦很不认同部份行家的工作方式，因而感到无瘾转行。不过，江华近年似乎又找到了事业上的新方向，逐渐在抖音平台活跃起来，尽管当初受邀带货的经验安排混乱，使他做了一次就喊停，但他因此接触了其他直播平台，有了新的启发，“原来喺里面都有好多人系喜欢我嘅，咁我就喺度谂，我又退咗休冇乜嘢做，有啲乜嘢做系可以有少少贡献呢？呢个都得㖞，我同老婆当一个节目之余，亦都可以以娱人，我觉得几有意思。”