钟发不满曾志伟约食饭放飞机大闹去死　钱嘉乐揽上身：电话我打

“洪家班”钟发早前现身YouTube频道“文隽 讲呢啲讲𠮶啲 Man's Talk”接受访问时，大爆曾志伟曾约食饭，但钟发从内地回港隔离完，对方竟然“放飞机”，因而嬲爆反面割席，更指老死不相往来。钟发指出：“洪家班有一日约我食饭，嘉乐（钱嘉乐）打畀我，我话咩事呀嘉乐？（他说：）‘曾生想约洪家班食饭！’我话咩事呀，我而家喺大陆，返嚟要隔离㗎㖞！佢话‘唔系呀，洪家班想约你食餐饭呀！’佢（曾志伟）啱啱入去无线新做台长，就想攞流量啦！我想问一句，曾志伟，你系洪家班㗎咩？我真系敢喷㗎！佢又要攞流量。”钟发讲到发火时更怒斥：“你去死啦，志伟。”事件惹起网上热议。

钱嘉乐日前（4/4）现身西贡出席校园巡回启动礼，就事件接受《香港01》访问时表示：“其实𠮶件事我都有打电话畀佢，不过都系一件好事嚟，因为我哋洪家班其实都系想出嚟聚吓会啫。（会唔会觉得钟发太过火爆？）咁又唔会，咁先系我哋啲前辈嚟，我哋𠮶行就系咁架啦。相信如果知道我哋呢一行都耐系会知，而我喺洪家班长大都几廿年，其实都见惯呢啲场面，其实练武嘅人实会有拗撬，所以我觉得系一件好事嚟，都唔需要咁介怀，因为嗌完交就会冇事。（钟发话曾志伟上场做经理，所以你约食饭？）呢啲咪就俾前辈先发（制人）啰。（咁你咪食咗死猫？）唔会，其实太耐冇聚埋，洪家班都有40周年，其实个电话系我打嘅，同埋第一时间要约埋洪家班嘅前辈，其实都好难，尤其是系疫情𠮶几年，我其实只不过系好心想聚一聚啫，主要系太耐冇见啫。（会唔会志伟上场做经理！）其实唔关事，系因为其实你哋知唔知吖？（唔知呀！）其实我哋想自己聚，系好私人嘅聚会。”