方力申婚后幸福肥最唔惯叫老婆　求婚宣誓感动落泪爆一事激嬲爱妻

方力申今日以点滴是生命荣誉副会长兼揹水大使身份出席《揹水一战2025十周年赛事》活动，方力申表示他已是第10年出任大使，第7次参加揹水一战慈善步行，觉得很感触。他又指自己没有练过行15公里，都有些惊。问到刚刚新婚的方力申为什么不带同老婆叶萱来一起参加，他笑言：“佢应该应付唔到，佢未起身瞓，要瞓美容觉，今日星期日梗系要瞓到自然醒。”方力申表示不用老婆为他准备早餐，他都是自己照顾自己：“拍拖时佢试过剥虾畀我，我话唔使，佢嬲咗话唔剥喇，以后就无再剥。”

问到方力申婚后最不习惯是什么？他说：“叫佢做老婆，佢叫我老公都唔惯，叫到好似好老咁。”至于他是何时计划求婚及结婚，方力申表示：“当我知道农历新年喺拉斯维加斯有个骚嘅时候，就有谂。我喺洛杉矶有个朋友佢帮安排晒啲嘢，买婚纱book场地影相𠮶啲都系佢帮我嘅，筹备咗两个月，老婆好surprise。其实我自己都无十足把握，求婚应该ok，但系签纸就谂住试下得唔得，我爸爸同细佬事前都唔知嘅，我妈咪就知道我会求婚。”他表示求婚戒指是帮衬林夏薇买的，他趁老婆睡觉时用橡筋圈来量度手指尺寸，不过林夏薇就指外圈内圈也有不同，两人为此研究了一段时间。至于结婚戒指他稍后会换，会和老婆一起去挑选。

方力申坦言求婚和签纸宣读誓词时都感动得哭了：“原来男儿膝下有黄金系真㗎，跪喺度嘅时候个情绪就会出嚟，同埋读誓词时都会眼湿湿好感动，用心读出嚟，我有喊，我老婆都有喊。签完纸返香港请咗一家人食饭，唔会再补摆酒，惊招呼唔到，又惊请漏咗啲朋友。（有无补返斟茶畀父母？）有，一落机返香港就去斟茶喇，我老婆跟我叫爸爸妈妈𠮶时，我爸爸笑得好甜好开心，我呢10年无见过佢笑得咁开心。我妈咪一向都好锡佢 (老婆叶萱) ，拍拖时已经讲话无论佢同我成唔成事都好，点都当佢系女架喇。”

至于可有计划生小朋友，方力申说：“都有谂住生小朋友，想身体好啲先，会去睇中医调理下，无话要几时生，顺其自然，仔女都无所谓。”方力申看来比前胖了一些，问到是否幸福肥？他笑言自己肥了十多磅，4月有个骚所以要keep fit了。