蔡少芬认婚姻曾有暗涌　有段时间常为张晋喊：我哋冇人哋睇得咁好

蔡少芬与老公张晋结婚以来都非常幸福，可说是圈中模范家庭，不过日前蔡少芬作客好友谢宁与兰茜的节目《Happy Women's Club》时，就坦言与老公张晋并非外人睇得咁好，曾有一段时间常为对方流泪。

蔡少芬其实好锡张晋，知对方爱玩穿越机都会去支持，感恩老公找到自己的兴趣，见对方去比赛又会在旁烧嘢食等等，但讲到相处，她坦言：“其实我哋唔系人哋睇得咁好嘅，试过有一段时间我成日因为佢我喊，尤其是喺上海𠮶段时间，因为疫情，我去咗上海两年，𠮶两年佢因为好忙，工作多到不得了，我就一个人睇住两个小朋友。我想倚赖佢，但系我又唔敢依赖佢，因为佢太忙，佢又要做《披荆斩棘的哥哥》，有几部戏，因为拍电影、因为疫情，佢又唔可以中间返嚟睇我，只可以喺电话视频。都感恩有视频，我都可以喺度喊呀剩，但系一个女人仔，加埋离乡别井𠮶种感觉，你会好需要有人喺身边支持自己。”

蔡少芬说当时有种无形压力，因为自己很喜欢黐住家人、朋友，但人在上海没有深交多年的朋友陪伴，老公又去了工作，使她很难过，“个女返咗学，我成日摆低咗个仔，瞓咗，我就自己踩单车出去公园喊，望住棵草又喊，祈祷，一路好唔开心，好难过，但系其实系自己唔开心。”谢宁说：“即系唔系老公做咗啲嘢令你唔开心。”蔡少芬就搞笑地咆哮回应：“佢做唔到啲乜嘢令我唔开心啰。”

她更大爆自己在21年还是22年生日更曾经崩溃，因为她期待张晋回来以久，虽然知道对方生病，但因为二人得几日时间见面，加上生日，她希望老公早上补眠后，与她去拍拖食午餐、睇戏，夜晚再跟家人庆祝，“点知佢瞓到成点几，我都觉得冇所谓，佢都话好攰，喺屋企食饭算啦，唔好出去，跟住佢话‘睇唔睇戏？’佢个样病咗，跟住我话‘你得唔得呀？’佢话睇，问我想睇咩，跟住我话‘我生日㖞，不如你拣啦！’跟住佢拣完我哋出咗去睇，成个过程佢都睇戏，又瞓着，又睇吓，我就觉得好似各有各睇咁，我觉得好惨，突然之间觉得好孤单。”

蔡少芬直言当下感受：“当然我净系谂我自己，唔会谂佢病啦，生日㖞！生日大晒！女人吖嘛，咁耐都唔嗲你，我嗲你一日啫，你都唔俾机会我？跟住走咗，佢又行先，佢话‘我好辛苦，我返去食药。’我话‘吓，咁你返去食药，跟住同班细路去食饭啦，OK，咁你返去先。’佢话‘你做咩？’我话‘冇嘢，你返去先，我唔想讲嘢，因为我一讲嘢我就知我会喊，你返去先。’跟住佢就跟住我后面，我就入咗公园坐低咗，我就喊。我觉得我咁耐我都自己一个，我生日都唔系好多要求啫？朝头早都俾你瞓，当然人净系谂自己，点解睇戏都好似我自己一个睇，连下午茶饮杯嘢都冇机会，你就要返去，夜晚我哋又book晒同屋企人食饭，我觉得我好委屈。sorry我比较自私，跟住坐低咗，佢话‘你唔好咁，老婆我真系好辛苦。’跟住我就爆咗出嚟，就闹佢点解你咁样呢？如果系咁样，以后我就唔好有要求！我冇要求，我冇失望，我话‘我识喇，我连生日都唔应该要求，以后唔会再要求，你放心！’佢就喊喇……”

此时谢宁和兰茜似乎都有点心痛张晋，蔡少芬问：“你哋系咪想话佢好凄凉，有个咁嘅老婆？跟住佢就话，我都系辛苦，佢话‘我知错喇，以后都唔会喇。’跟住我话冇嘢，跟住我就返屋企，一路抑郁，加埋好多嘢。”谢宁和兰茜觉得张晋很可爱，又赞蔡少芬非常坦白，会在镜头前分享这么真情流露的一面，蔡少芬即醒起：“哎呀，我好似有闹过你，我记得你话好委屈㗎㖞！”谢宁就叫蔡少芬快点跟观众讲发生了什么事，原来当年蔡少芬拍《珠光宝气》，张晋一直想揾机会求婚，好几次都被拆穿，之后有一次，她拍完戏准备回家，谢宁就漏夜打畀一位整花的朋友，连同一班好友匿在她家中厨房，畀惊喜蔡少芬，岂料蔡少芬突然放屁，她说：“我唔知，仲放咗个屁，结婚，佢问我愿唔愿意，‘呠～’跟住我老公话，‘点解你会咁㗎！好臭！’跟住成班人就话‘好臭呀蔡少芬！’原来佢哋成班匿埋喺厨房，之后有记者抄嚟问我，阿晋同你求婚，我就话我仲拍紧戏。”

谢宁就问蔡少芬：“你怀疑我？”蔡少芬回答：“唔系怀疑你，系真系你，但系唔关你事，系因为你。跟住我问（记者）点解你知？有咩事呀？跟住𠮶个女仔就话系阿宁嘅朋友，Dora，总之整花𠮶位话畀佢听，跟住我即刻问你，你话点解会咁，因为𠮶刻我想保守秘密，仲未公开，我话‘阿宁……’你知我个人一定要爆出嚟！我唔爆我会谷住喺心里面，我唔识讲，我话你点可以畀呢啲嘢出咗去㗎！佢话咩事呀咩事？我话‘你俾你朋友出卖咗喇！’跟住佢即系搞掂件事，然之后《明周》冇出到。”蔡少芬表示，之后有其他朋友告知，谢宁因为此事很不开心，她反而想：“吓！我俾人爆咗，佢仲要唔高兴？唔通又系我错？”不过她反省过后觉得自己真的有错，因为谢宁只是出于好心，自己也不应该用这样的态度跟对方说话，于是就不停跟她道歉，“跟住佢仲话‘你讲咪得啰，唔需要咁恶，我未咁样俾人闹过！’跟住我话‘我唔应该，我唔应该。’”

谢宁笑言：“我由细到大俾屋企人纵坏咗，我未俾人闹过，系呢个女人闹我，仲有另一个女人闹我，我唔讲边个，指住我嚟闹，我成世净系受过呢两个女人气！”蔡少芬还立即在节目上跪地道歉。