193由目中无人到学会谦卑　认同公司冷处理手法：冲出嚟只会更错

193去年经历过“撞倒途人”事件后，曾一度“收埋”自己，很怕走在路上看到别人的眼光，曾说“错误中学习”的他，终于明白学完未必可以翻身的道理。“我系好内疚，做晒可以做嘅善后工作，呢单唔系平时冲口而出啲黐线嘢，我系非常错。平时小风波，𠮶啲会有商确、会有人认同，我就会坚持自己论点，但撞到婶婶无得坚持，因为我系错，要道歉同改过。”

193其后藉著《Keep Walking》鼓励自己走出低谷，他指落笔第一句已有“东山再起”，但愈想愈觉得黐线，后来改成“要有志气 不要妒忌 要争一口气 把握所有契机”，他认为自己没有太多妒忌，深明娱乐圈除实力之外，运气亦很重要。“每个人机遇都唔同，所以会同自己比较多啲。我会羡慕人多过妒忌，填妒忌系因为啱音、押韵。把握契机都有，但得唔得又另一回事，不过我信做好咗总会有啲嘢返嚟。” 歌词中的“谦卑 化作 新的哲理”是193近年所学的事情，镜头前的他予人自大感觉，但他强调是人设之一，只有保持谦卑才会令自己进步，他称：“而家阶段都好飘忽（笑）间中做到，间中做唔到，但无以前咁目中无人，以前太自我中心，而家会谂多咗好多，世界真系好大。”193曾经自我中心到连队友都视为无物，如今回想都觉可笑又幼稚。

唯一可以肯定没有谦卑的地方，绝对是网络世界，不时“真挚回应”网友，193直言“你唔respect我时，我都唔需要respect你，你闹我都无谦卑之心。经过呢几年洗礼，都识分好同坏嘅留言，有时闹你未必系唔好，佢哋有可能基于事实去评论，我会多谢对方。但你话我颁奖礼黑面，其实都系影到我一两秒，我好似系佢人生焦点。”曾在ERROR演唱会上颁奖予自己，问到是否很介意没有奖，193说：“因为又无，所以先咁介意人哋话我黑面，我坐咗5年，有得坐都庆幸啦，同埋佢计播放率，一早都计到，要黑我几个月前已经黑。攞唔到系自己未够尽力，又或者运气未到，但绝对唔会唔开心，我谂连我哋最die heart 粉丝都唔觉得我哋会攞奖。”产量不多，193 笑言最有机会夺“长期服务”奖。

过去无论是MIRROR、ERROR、COLLAR有负面新闻出现时，MakerVille的冷处理手法都令粉丝极为不满，对于艺人是好是坏？193强调与公司默契十足，假如公司每次都出面处理的话，情况未必有帮助，又大大力感谢公司：“每次发生事，公司都会同我哋讨论，处唔处理又另一回事，又或者处理唔到又系另一回事，有时啲人话冷处理，咁有时处理唔到咪真系要冷处理，我系咁谂，有时冲出嚟只会令你更加错，公司畀我哋宽容度真系好大，访问无人闸住我哋，如果唔系我都唔会有人识。如果我喺其他公司，咁乱讲嘢时第一日已经入雪柜。”

提到另一队友保锜闹出的合照风波，193认为与保锜同属冲动派：“冲动有好有坏，今次唔好处会多啲，但呢件事好对立，我都唔知点去评论，我识佢咁耐，佢系心哋好，纯粹蠢，佢ADHD(注意力不足过动症）最劲，成日都唔会去谂，唔好话问我哋，佢连自己都未问就出post，所以呢件事纯粹蠢同冲动，佢心地绝对唔坏。佢长期都ADHD，真系及早治疗。”193透露兄弟见面时，保锜有向大家道歉，但众人都明白他只是善良、心地好，纯粹ADHD影响，曾因为ADHD而睇医生的他，最后建议都系“及早治疗”。

Makeup： Giann Cheung @Annie G. Chan Makeup Centre

Hair： Man Chan @CHIC Private I salon

Styling：: Alexiar Chiu

Wardrobe：: Balenciaga, Vivienne Westwood, Wallace Stores by Wallace Kwan, Carhartt

场地：香港知专设计学院V Music Library