麦玲玲爆男星偷食常用招数　唐诗咏自以为识查男人反被取笑太天真

麦玲玲日前现身由唐诗咏与练美娟主持的网台节目《丝打围炉》，除了讲蛇年12生肖爱情运外，亦分享驭夫术及爱情观。玲玲姐认为同艺人拍拖比较危险，直指拣某类男人，出轨率会较低。而当唐诗咏自信满满指出同男艺人拍拖容易查到对方工作行程时，麦玲玲却大爆男艺人出轨惯用技俩，令唐诗咏难以置信，被玲玲姐指她：“佢果然系咁纯真㗎㖞！”

节目中唐诗咏先问到玲玲姐爱情该如何保鲜，指自己见到对方与老公很恩爱，因而相信爱情，玲玲姐反问：“你信唔信有保鲜？我其实唔信，我信爱情，但我唔信段关系可以好长久。”她指自己过往都曾被记者问到如何与老公保鲜，就回答关系中两个人都要有独立空间和自由；但老公则向记者表示要忍让，笑称：“有几忍让呀！想打佢呀！”

玲玲姐坦言自己当初拣老公时已立志要拣一个稳定的人，唐诗咏亦说：“你老公有度好，你真系唔使惊佢会有小三吖嘛。”玲玲姐教路，若女人想要安全感，最好拣一个闷、生活有规律的人，透露自己跟老公初相识时，对方已自动报备：“佢系𠮶种，如果一阵间要去开会，佢就会打定畀你，或者留message话我一阵开两个钟头会，你可能会揾我唔到，我开完会会话返畀你听。报备系聪明嘅，到头来我而家发现报备系最聪明嘅做法，以男仔嚟讲，譬如你阵间去揼骨，你就话‘老婆，我阵间开两个钟头会，可能听唔到电话，但系我开完会会打畀你。’你就唔会再揾啦嘛！但系如果你系咁打，揾唔到嘅时间，你就会着火，其实呢个做法最好，无论你嘅报备入面真系做咗啲乜。”

唐诗咏指有人觉得报备就会冇自由，玲玲姐表示：“其实呢啲先系最大嘅自由！所以聪明嘅应该咁做！”、“如果你有啲鬼鬼哋嘅嘢，你报咗，稳阵吖嘛！”娟姐指自己不习惯报备，因为由细到大家人都不会催她回家，所以就算长大后正常拍拖都好，都觉得要报到很麻烦：“做正常嘢有乜好问啫？我而家呼吸喇，拜拜。”玲玲姐都同意，坦言自己都少报备，不过确实她当初立志要跟稳定的男人结婚，首先不会拣生意人，因为时间太自由，诱惑又多，相反他的老公返工跟政府工差不多，四点几已经可以洗定手准备放工。

玲玲姐开始讲到男人不同偷食方式，例如说夜晚要去上课，她又说：“如果你嫁俾专业人士、律师，佢突然间电话响，话‘个client揾我，我要去保释个client，今晚唔使揾我，有排搞。’咁你点呀？阻住人做嘢又死，真定假永远唔会知，系咪？”她觉得跟医生拍拖已算比较好，因为医生要睇住间舖，只要你不要让她聘请太靓女的护士已安全。娟姐之后问，其实艺人时间都很不稳定，又多应酬，是否不宜拣男艺人拍拖，玲玲姐直言：“我觉得系㗎！”她认为靓仔靓女只适合跟几种人交往，有钱人、艺人、骗子，狠批：“你留喺其他人嘅手上多数都出事。”因为要驾驭到靓仔靓女都实在太难。

唐诗咏提出一个观点，她说跟艺人拍拖，容易掌握对方时间表，变相对方难讲大话：“如果你话你去庆功，咁你实知㗎嘛，大家做呢行，有冇庆功宴你点会唔知啫？你开工点会唔知？”不过玲玲姐就觉得她太天真了，并大爆男艺人偷食惯用技俩，表示：“通常啲男仔会咁做，我见到好多就系，大家坐低，‘到咗，我而家走先喇，唔好话我去咗边！’梗系咁㗎啦！你估佢真系坐成晚呀？佢话畀你听佢attend呢个event，可能系1分钟，大把啦！”更取笑唐诗咏：“佢果然系咁纯真㗎㖞！”娟姐都附和说：“佢仲系咁纯真㗎，好可贵呀呢件事！”

虽然不知道玲玲姐所讲的男艺人是谁，不过唐诗咏似乎感到难以置信，玲玲姐续问，当该男艺人说自己去庆功，有冇影相畀诗咏睇，诗咏说：“冇。”玲玲姐则谓：“仲唔走呀？有得分呀？系𠮶啲时间㗎啦，好正常啫，佢系有去呀，但我见佢哋通常到咗之后就走，话跟住有啲事要走先。”娟姐再问玲玲姐，结论是否就是不要拣艺人，她就回答：“起码都靓仔，如果你净系享受个靓仔同埋青春，我觉得OK嘅，冇人叫你同佢过人世呀！”不过纯真的诗咏则始终相信有例外，更举马国明做例子，玲玲姐笑说：“咪就系讲咗几十年都系得马明啰！”

最后，娟姐问玲玲姐，当红女艺人找另一半是否很困难，玲玲姐直言的确比较难，她解释：“因为女仔命格入面，如果你有出名呢个星，呢个系伤官星，伤到官星就系你老公，换句话说你只能二拣一。如果你名气运、事业运同埋攞奖运好凶，就更加难有一个稳定嘅对象。所以你见到好多一系就急流勇退，或者冇再捧红，可能嫁得好地地。红咗𠮶啲又要嫁得好，又要唔离婚，其实系好难，好难样样嘢都咁好。”娟姐都替唐诗咏担心，不过唐诗咏就说自己追求爱情、不追求结婚，最重要有自己生活和过得开心。