专访｜林景程社恐在片场好蚀底 鲍起静一眼看穿用母爱举动助破冰
“我好憎呢个性格呀！”一提起自己内向拘谨的一面，林景程直言好无奈。总觉得娱乐圈是“E人”的天下，“I人”在这一行很蚀底，林景程自言受童年的经历影响，见到长辈就定晒格，也难与人开话题，拍剧等埋位时都宁愿静静匿埋。他知道自己需要主动点，曾试著努力Social，但总是“dead air”收场，效果强差人意，他不禁说：“真系搞唔掂！”为何一个怕尴尬、怕搭讪、怕交际嘅人，还可以在娱乐圈生存到18年？他感恩多位前辈主动示好，例如曾被指很恶的郑嘉颖，以及影后鲍起静等，都曾做过令他受宠若惊的举动，使他铭记于心。
场地：New York Cut
专访｜林景程弃高薪追梦家人不认同 遭父指受骗入行：佢系金钱派
林景程给人的感觉斯文、谦虚、乖仔，讲到是否从小到大都循规蹈矩，他直呼：“我好憎呢个性格呀！”小时候家人已训练他，见到长辈一定要叫人，无论对方是否得闲，都一定要叫一句，而这竟然令他长大后见到长辈就很害怕，“就算去片场都系，我系好孤僻、好社恐咁样，我见到人多我又惊，见到长辈我成个系定晒喺度，佢讲咩我就话‘系系，好好好，得得得，明白明白，可以可以’，𠮶种嚟㗎。但系对我嚟讲，咁样好拘谨，我唔想自己咁。”他认为这个绝对是影响到演艺工作的缺点，非常吃亏，尤其是演员之间很讲求沟通、默契，但他却自言“我沟通唔到”，有时讲完一两句，已不知如何接下去，拍剧等埋位时索性躲在一旁，让大家找不到他，“我唔识交际，我真系好差。”
尝试戒内向主动开话题 气氛反而更突兀
景程不是未试过改的，人人都说，见到监制要Social，他也试过主动上前搭话，但结果如何？他说：“好odd㖞讲完之后，仲odd过好似你就咁同佢讲声‘早晨！午安’咁样，𠮶件事系搞唔掂。（系咪接唔到落去呀？）接唔到呀！接完落去之后，我就心谂‘哎呀，死啦，dead air dead air，䢂仲未到㖞！我要讲啲咩呢？真系唔知！跟住开门出去，‘好啦！拜拜！’”讲完这句他再做出掩面动作，坦言：“真系搞唔掂。”实在十分搞笑。其实他也曾担心被觉得不合群，所以其他人倾偈，他也试过站过去尝试插嘴，却总是找不到适合说话的时机，他更说：“我真系觉得自己做得好核突！大家倾偈我就企埋去，尝试讲，好似冇乜位插到入去㖞，跟住我就全程变咗企咗喺度，跟住笑，熟我嘅人都知我系咁样，佢哋又冇乜嘢，初初就可能觉得我好怪。”
性格拘谨怕长辈 鲍姐一个举动超暖心
幸好景程在圈中遇到很多有爱的前辈、同事，例如在《下流上车族》演他母亲的“鲍姐”鲍起静，景程对她非常尊敬，有很多话想跟她说，却不知从何入手，然而鲍姐也察觉到这一点，于是主动示好，“我记得有一次我化妆，化完之后佢从后揽住我，揽过嚟，佢同我讲嘢，跟住𠮶刻我觉得好温暖！我知道佢系见到我好拘谨，而佢演我阿妈㖞，佢想打破呢样嘢，真系好好嘅前辈！我𠮶刻同佢嘅戏，我系放松咗好多。”景程表示，自己在过往未必太多发挥机会时，所幸都有机会伙拍一些很好的演员，因此即使自己戏份不多，靠住观察、请教等等，对提升演技都有很大得著，先是《踩过界II》的秦沛，再有令人觉得意想不到的视帝郑嘉颖。
曾听闻郑嘉颖好恶 私下真面目令人意外
景程与嘉颖在《星空下的仁医》合作，他曾听闻嘉颖是个很恶的人，起初完全不敢跟对方攀谈，“我以前唔认识嘉颖𠮶阵时，好多人都话佢，‘好恶㗎！唔好呀！唔好问啦，傻㗎咩？黐线！’但系我面对嘅佢又好Nice㖞！”他指嘉颖教了他很多，当记者问到，既然外间说嘉颖这么难相处，内向的景程怎么会够胆开口，但原来是嘉颖做主动的，其举动更令景程受宠若惊呢！他说：“所以我话嘉颖其实系一个好好嘅人，因为𠮶排电视播紧《杀手》，开紧工嘅时候，佢主动同我讲话：‘我有睇你《杀手》小秉，‘做得好呀，有嘢㗎，做得好！’我话吓？郑嘉颖同我讲呢啲嘢？跟住我就‘多谢多谢’，打蛇随棍上，我就问佢究竟演戏应该点，因为佢打开咗个话题，令到我觉得呢个人系可以接触，唔系我想像中𠮶种恐惧，传闻嚟嘅啫我觉得。”
郑嘉颖不厌其烦教演戏 演路人甲成功开窍
景程说，自己当时戏份少，要准备的其实不多，于是在现场不断捉住嘉颖问问问，“问到我自己都觉得烦！佢冇发过任何一个脾气，佢真系全部慢慢同我讲。”景程指自己做一整场戏反而还好，但以前常常都会做一些行行企企、无端端走入场景，讲完一句对白就走的角色，他总是演得很不自然，而嘉颖一语中的直出问题是景程“唔入局”，他续说：“我𠮶一句对白就讲得好衰嘅真系，一句真系十只字唔够，但系真系㪐㪐㩿㩿或者窒。我记得我问过佢呢个点样处理，因为我好困扰，对我哋成日都要做呢啲行行企企走入嚟讲一句嘅，佢系会讲返𠮶个心态，即系你入到嚟之后，其实你就净系谂住想讲𠮶一句对白，咁𠮶一句对白就唔得啰，你系点解入嚟、你个角色系点样、你出面做紧啲乜嘢先？你所有嘢有晒喺度，你咪等于一场戏啰！你成日都挂住入嚟，我净系要讲𠮶一句对白，讲完就走，所以唔会演到啰。”他听完后茅塞顿开，之后演出也差很远了。
与佘诗曼对戏 惊叹神级演技原来已留力
景程在2023年的神剧《新闻女王》中，演出中枪昏迷十年再奇迹苏醒的梁Sir，说句话都有困难，要逐个字吐出来，他演绎得非常好，其中一幕他要跟累他中枪的“Man姐”佘诗曼和解，问他有没有从阿佘身上学到什么，他说：“佢𠮶种我系100%学唔到，因为佢系对我嚟讲，我觉得唔系人嚟㗎，佢系神嚟㗎！佢𠮶种运用眼泪嘅能力系，你唔会知道一个人系点样可以调动到𠮶个情感，而你望上去系咁随意㗎。当然我明白佢系做咗好多好多好多好大量嘅功课先会有咁嘅嘢，但你要做到出嚟其实系好难。”
他指拍摄那一幕自己有很多对白要讲，前半段镜头特写再自己，但他讲到中间见到阿佘已经快哭出来了，所有情绪都已准备就绪，当时他心想：“我仲有半页纸未讲㖞。”而非常惊慌，然而最终其实是景程过虑了，他说：“做完我，再take佢嘅时候，哗！原来佢系已经留咗力㗎喇，我望落去已经好靓，再Take佢嘅时候，𠮶个先系最靓嘅佢，好难可以hold得到咁样嘅嘢，但系佢做到，呢样嘢我觉得就算佢话畀我听点做，我谂我真系做唔到。”
后记：
访问中，林景程说了很多次“我好好彩”、“要多谢个天”，也感谢了很多圈中的前辈、朋友，明显地是个很懂得感恩的入。然而，笔者却觉得，他忘了多谢一个人——自己。想做好一件事，除了运气，若然自己完全不努力，根本是没可能成功的，不论是考会考、考大学、歌唱比赛，还是拍剧等等。访问期间总觉得景程对自己信心不足，常常否定自己，知道他获奖后，实在很希望奖项能帮他建立信心，他坦言：“人生上面嘅信心就大咗，一直唔知有咁多人支持自己，点知收到好多人嘅鼓励，发觉原来好多人留意咗林景程呢个演员好耐，好感恩嘅。不过演戏信心就冇大到 ，反而觉得自己仲未‘晾’得起个奖，会要求同提醒自己再努力啲同做好啲，好似多咗啲压力㖭，怕做得唔好会对唔住个奖。”
他又透露：“我老婆都话，真系见到好多人支持我，话我自己反而就系最质疑自己拎到个奖嘅人，学紧唔好再睇少自己，仲要成日提自己，学习中🤦🏻♂️”笔者发现，虽然他没什么野心，但总会散发一个气场，让你想去帮助、支持这个人，见到他在萤幕上出现，你会觉得舒服，也很难去讨厌他，这样的观众缘其实比演技更得来不易，也是一种天赋。其实在写访问期间，笔者翻看一些他的旧片段，早在几年前已有观众留言，认为他值得攞“最佳男配角”奖，而今次他得奖后，有观众更特地去这些片段的下方再留言说：“成功了！”非常替他开心，希望景程也学会在谦虚之中相信自己多一点！
.