李香琴出殡︱大姐明最怀念一同穿泳衣做亚视骚：好佩服佢敬业乐业

资深艺人李香琴于周一（4/1）因病逝世，终年88岁。昨日（25/1）于红磡世界殡仪馆设灵，圈中多位艺人都送上花牌及到场送琴姐最后一程。大殓仪式于今早举行，跟琴姐早有渊源的“大姐明”林建明亦早早到场。

大姐明跟老公曾展章一同接受访问时，透露自己跟琴姐相处冇大冇细，更以花名称呼大家：“我叫佢Piano，佢听到就会卡卡笑，好开心好玩得。唔会好似啲长辈称呼我阿明 ，叫我大姐明，成日一齐玩一齐食饭。”她续指印象最深刻的就是，在亚视跟琴姐一起穿上泳衣做骚和在《欢乐今宵》一同演出：“个个都兴爆肚爆阴毒，有次佢就阴毒得紧要，喺心口黐咗执毛。好佩服佢敬业乐业，人又好，好怀念佢。依家都系笑丧，希望佢喺另一度快快乐乐。”

大姐明表示早两年曾探望琴姐，当时她已经不能再工作，需要留在家中休息，哽咽说：“开始慢慢唔系好记得人，当时我希望唤起佢多啲回忆，问佢记唔记得歌词，即场同佢唱粤曲。之后过咗一段时间，朋友话一齐去探佢，但就话佢依家完全唔记得。呢刹那我就比较伤感啲，好好哋突然又唔记得你。”问到还有甚么话想跟琴姐说，大姐明谓：“佢依家无忧无虑，希望佢遇返啲老友记，炳哥肥姐，一班老友打麻雀去玩。”