全民造星III︱李静莲Alina掷6位数积蓄追梦：钱可以之后再揾番！
ViuTV选秀真人骚《全民造星III》于上月26日结束，无论是节目播出期间以至决赛表演时多么技惊四座，面对疫情下娱乐圈半停摆状态，所有参赛者也要回归一边等运到一边食谷种的“日常”，就算打入十强、又睇得又跳得的李静莲（Alina）也同样如此。“其实‘二十进十’𠮶时已经好惊，当一刻已经唔系谂紧比赛嘅输赢，而系谂之后会系点，真系唔想个比赛完，好惊又要返番现实，又要等工作、等机会。”
撰文：陈栢宇
摄影：梁碧玲
服装提供：D-mop
入行4年的Alina虽然拍过ViuTV《黑市》、无线（TVB）《宫心计2深宫计》，但演艺作品始终屈指可数，每年仅得一至两套剧集、节目出街，令她一度怀疑过自己是否仍属“表演者”身份，幸而《全民造星III》令她重新返回轨道，但过程中又担心比赛后再次打回原形：“好在喺比赛之后有导演、制片打嚟问我有冇兴趣去Casting，其实我一直都想行演员呢条路，只系咁耐都未有Connection。”
徘徊在演艺上的公路三岔口，Alina并非没有想过转軚驶入其他领域，完全放弃幕前工作：“大家都知呢行揾到几多钱，系好难挨，好似每一刻都谂紧要放弃咁。（边一刻最想走？）望住Stanley（MIRROR成员、男友邱士缙）好好𠮶阵时，其实唔算好难受嘅，而系会问‘点解我遇唔到呢啲咁好嘅机会？’，但系而家谂番起拎男朋友同自己比好戆居。”
坚持每月畀一万蚊家用
口讲难挨，但最终都算撑得过，Alina不是因为凭梦想、意志力，而是做副业赚外快：“揾食一定唔系靠做演艺呢行，我自己都有小生意，同埋会Keep住周围飞去做一啲跳舞Event，叫做可以满足自己之余又揾到钱。（畀到家用？）呢个系我对自己嘅最低要求，屋企唔使我畀好多，都系一万蚊左右，点都畀，都养到我咁大。”可能是Alina的父母在她只得4、5岁时便已经分开，加上妈妈后来陪弟弟去外国读书，令她中一、二时已经开始学识独立，意识到不但不能为他人带来麻烦，对自己也要有一定要求：“虽然我系跟公公婆婆住，但系基本上所有嘢都自己搞掂。”
点选下图观看Alina专访表情包：
没有跳舞底子 将勤补拙
对自己要求高，面对挫折时，会跌得更伤、更难受。Alina因为中四时修读了演艺学院（APA）的Part-time课程，接触了舞蹈，中五会考后索性考APA，后来获得录取，主修现代舞。“不过严格嚟讲，我系冇舞蹈底，所以入到去系好辛苦，死顶啰，尤其系芭蕾舞对我嚟讲系最难，因为我天生手脚唔协调。”
没比较便没有伤害，Alina同班同学几乎个个都有舞功底子，反观自己完全不懂，所以每当上完芭蕾舞课一出门口便崩溃爆喊：“老师系好传统𠮶种，即系如果你跳得最差，你就要企第三行，咁我永远上堂都系第三行，因为我真系好新。好记得有一次老师话：‘你呢个动作可以做好啲’，我喊到收唔到声，‘点解我做唔到？’。”
不甘心，就要将勤补拙，所以Alina去了补习，没错，跳舞都有补习，每晚7点放学后，她都会到外面的Studio再接受训练，如是者三年便过去了，舞技确实大有进步，但心内的结却是愈来愈紧：“学校系有心理医生，Year 3时睇咗足足一年，Check咗系抑郁。医生话要靠自己，之后就唔知系唔系因为公公过咗身，跟住就觉得其实其他嘢都冇咩所谓，好似睇通咗、成个人都轻咗。”心宽，路便会走得远，就连系主任都察觉Alina大有进步，不过当刻她已经不像往日如此在意他人想法：“个人是但咗，原本真系Aim First Hon毕业，临尾都是但埋，过到Attendance就OK。”
Alina在阳光下翩翩起舞，怎会想到当年的她是“手脚不协调”：
曾递表参选港姐
毕业后，Alina做过3、4年全职舞蹈员，随“左麟右李”团队东奔西走。然后，她在25岁时突然想起将来的路：“当时Sunny Wong叫我跳埋郭富城先决定再唔再做Dancer，但我觉得去到25岁，如果再唔离开，之后就会唔敢离开，所以我就拒绝咗，然后就去参与《美选D.n.A》。”原来Alina在正式参加《美选D.n.A》前曾经递表参选港姐，提名人更是“校长”谭咏麟，可是最后连面试的机会也没有：“总之就系冇拣到我，可能系我最后一刻先报，当时我仲谂紧去边度好，结果个天帮我决定咗。”
花尽6位数积蓄参加《造星III》：开心就好！
Alina承认，曾天真的以为参加完《美选D.n.A》后可以Job接Job，当然各位读者都知道事与愿违：“不过现实就冇打沉我嘅，条路自己拣，系自己想出嚟自由身再闯荡下先，所以临尾冇签ViuTV份约。”然后辗转4年，期间曾经签过一间经理人公司，完约后回复自由身，并重返ViuTV，将多年死悭死抵得来的6位数字积蓄，投资参加《全民造星III》：“玩《造星》真系倾家荡产，衫全部都系自己准备，决赛件红色战衣度身订做要成一万蚊，仲有搭出租车钱，我住坪洲，坐完船唔系由中环飞去荃湾西Studio就系去九龙湾ViuTV，每程都要200蚊。追梦真系使好多钱，当初都冇谂过咁多，而家真系重新储过，开心就好，钱可以之后再揾番。（Stanley有冇资助？）叫佢帮手买啲嘢，佢冇问番我拎钱，哈哈！”
“大表哥”全力支持女友追梦
《全民造星III》比赛初期，拍拖近4年的Stanley仍身在台湾拍摄新剧《尘沙惑》，只能隔空遥距支持Alina，到回港出关后，才全力支持女友追梦，Alina讲起对方贴心举动时不禁甜笑：“佢返香港之后，我就感受到有Assistant嘅美好，最夸张𠮶次系，A组‘战狼11’（A组的别称）最后一次开会，突然间有人话好想食苹果批，佢住马鞍山，我就问佢可唔可以铜锣湾买苹果批畀我哋（食），然后佢就买完之后去荃湾西，变咗外卖速递员。”
点选下图观看Alina的IG靓相（内含大表哥与大表嫂放闪图）：
除了“大表哥与大表嫂”之恋，不少人都记得Alina曾与胡定欣前男友、音乐人陈明道（Terry）传绯闻，不过Alina便斩钉截铁指自己仅视对方是父亲、师傅：“我同Terry冇拍拖啦！所以第一次听到时系‘吓’，然后再传就系有少少无奈，最近这段新闻再被翻炒我都有主动同Stanley讲，大家都觉得Bad news都系Good news。（因为娱乐圈系咁运作？）系，所以之后嘅路，我唔系话想行得顺畅，而系想多啲嘢嚟，就算系唔顺，我都想要，因为要跌过先识爬起身。”