《东张西望》Patrick Sir林溥来报喜　太太关宛珊陀仔：辛苦你喇

2020年进入最后一星期，娱乐圈接连有喜讯传出，继胡杏儿及余香凝宣布怀孕后，呢日轮到Patrick sir林溥来报喜﹗佢太太关宛珊已经怀孕5个月，仲要一索得男：“由我哋拍拖开始就已经存在第三者…而家仲多咗个第四者﹗”

关宛珊与Patrick Sir分别喺IG贴出数张孕照，见到佢地抱住爱犬一齐合照，又有露出孕肚，新手妈妈流露出幸福表情，Patrick sir仲脱去上衣裸上身陪太太合照。Patrick sir话：“呢个天使化身系我老婆Kimmy呀！见到佢个肚多咗啲嘢？𠮶个系上天送俾我哋嘅圣诞礼物嚟㗎，份礼物我哋5个月前已经收到，仲睇住佢越嚟越大，而老婆面上嘅笑容就越嚟越甜。老婆，虽然每次问你你都话唔辛苦，但系我都要再讲多次：辛苦你喇！嚟紧你要对住我同Don Don加BB呢个超级男团，你一定要有更多嘅耐性，但系我保证我哋必定努力为你奉上幸福、快乐！”

至于关宛珊亦表示：“由我哋拍拖开始就已经存在第三者…而家仲多咗个第四者~ 呢个第四者好乖…喺我哋搬好屋Settle好…喺我完成N3日文呢个目标嘅当日…先俾我哋知道肚里面住咗个小居民~ 我哋继续去边都带埋呢两个电灯胆…一家四口开开心心”