龚嘉欣演《杀手》Dark Angel伤患缠身：都唔知道原来伤咗咁多地方

刚过去嘅TVB台庆夜，龚嘉欣（Katy）身穿火红斜肩连身长裤帅气登场，但当晚未见Katy参与表演，原来佢系有伤患在身，更因此要辞演《金宵大厦2》。Katy接受《香港01》访问时话：“入行咁耐都冇推过任何剧，今次系第一次。”

拍摄剧集《杀手》时，龚嘉欣饰演嘅冷酷杀手Dark Angel打戏连场，成身伤痕累累，甚至连手指筋都断埋。相隔两年原来伤患一直缠身，Katy接受《香港01》访问时话：“其实之前一路都开工冇正视到呢个问题，只系觉得keep住少少痛，应该唔大问题，都唔知道原来伤咗咁多地方，背脊肩胛骨同lower back都受咗伤。拍摄嘅时候真系冇谂咁多，净系好想做好件事，其实都真系拖咗好耐冇正视到呢个问题，所以而家真系要按返医生嘅指引，定时做物理治疗。”

2008年入行以来，龚嘉欣出名勤力，剧接剧无时停，但因为伤患终于要第一次推JOB，本身已为《金宵大厦2》试造型都被逼忍痛辞演：“入行咁耐都冇推过任何剧，今次系第一次，因为受伤所以拍唔到。都觉得可惜，《金宵大厦》第一辑咁好成绩。其实开工系冇问题嘅，除咗物理治疗，医生叫做返多啲拉筋动作，依家为新剧做紧准备，所以更加要快啲睇好自己嘅旧患。”