范振锋因疫情少7位数字收入　决心离巢：TVB话暂时冇工作延续落去

效力TVB多年的范振锋（阿范）早前宣布离巢，佢日前接受香港开电视主播马梓轩专访，分享离巢后心情：“我喺8月底离开，事前旧公司有同我倾续约，当时我问有冇咩工作可以延续落去，但佢哋都话暂时冇，所以决定离开！自己又冇唔开心嘅，因为我唔系全职净系做一份工，所以唔会令我好担心疫情下冇咗主要收入，又或者怕影响生计！”

虽然阿范身兼多职，有电台DJ、电影监制等工作，但疫情下，阿范收入大减，他说：“疫情开始至今，少咗7位数字收入！好彩我同老婆都系好悭嘅人，平时都系睇戏食饭，而家旅行都去唔到，出街食饭亦少咗，所以我已经好识用网上外卖平台，好精明一睇就知边间最抵食！不过都感恩电台、娱乐公司都可以继续Keep住有份人工畀到我！”

问到疫情下，会否影响与太太的“造人”大计，阿范笑言：“以前就觉得顺其自然，而家就冇咁自然，哈哈！因为除咗担心疫情，个世界好似好恐怖同混乱！另外就系实际问题，原来疫情真系可以令人冇工开、零收入！自己可以慢慢挨，但如果生个小朋友，佢可能仲辛苦仲惨，所以都令我同太太有啲却步！”