石咏莉膺微电影影后　邓健泓双喜临门揽妻浸浴

由邓健泓（Patrick）首次执导、太太石咏莉（Sukie）担任女主角嘅微电影《Dreams Come True》，继今年6月于洛杉矶电影奖（LAFA、Los Angeles Film Awards）夺“最佳新导演（短片）”后， 前日（8月27日）再传来好消息，“第七届创+作微电影支援计划（音乐篇）”（专业组）网上公布赛果，Patrick双喜临门，除夺得“最佳微电影制作大奖”铜奖外，Sukie更摘“最佳微电影女主角”金奖，成为微电影影后。

是次颁奖礼因为疫情关系，由本来3月举行延至昨天网上公布得奖名单，虽然等候日子有点漫长，但到宣布赛果时又感觉特别，Patrick话：“喺现场等揭晓赛果，需要一定演技，用力掩盖自己紧张嘅表情，努力抑压兴奋或者失望，继续演绎微笑大方，喺屋企就唔使咁多负担，哈哈！得到两个奖项好开心，特别系Sukie攞到女演员金奖，上年佢有参加第六届，攞到最佳女主角初级组金奖，今次攞埋专业组金奖，系有啲实力，我都好Proud of 佢；微电影攞到铜奖我都开心，好多谢一班团队。”

Patrick谂起Sukie获奖一刻反应，不禁笑说：“啲人成日话开心到跳起或者开心到飞起，Sukie等紧赛果时，第三名第二名唔系佢，咁佢有啲紧张，原本佢系坐喺度，到知道自己得金奖时，佢好大声嗌咗出嚟，然后跳高咗，不停跳咗三四下，咁我当要配合佢企起身，佢就捉住我只手，好似小朋友攞奖咁，佢尖叫嘅欢呼声，上下五层楼都应该听到。”至于俩口子会如何庆祝？Patrick 笑谓：“我哋嘅庆祝方法系浸浴。”哗，好香艳！

成为微电影影后的Sukie，直言获奖受宠若惊：“我多谢番邓导，佢功不可没，导戏导得好我先拎到呢个奖，同埋多谢台前幕后每一位人员，佢哋用咗好大努力去做每一件事。”Patrick指老婆得奖开心到跳起，Sukie笑说：“呢次网上举行颁奖礼新鲜感好大，喺收到消息嘅时候我系开心到弹起咗同尖叫，重点系我冇谂过自己可以弹到咁高！哈哈！呢次喺屋企着住睡衣、唔化妆等消息公布都系好大体会，可以尽情嗌，将自己嘅兴奋表露无遗，呢样系前所未有嘅开心，好多谢每位喜欢呢部微电影嘅朋友，希望未来有更多电影作品畀大家睇到，亦都希望自己有多啲机会做演员，原来演戏真系好好玩。”