【安心事件】黄心颖几时可以复出？　乐易玲：咁深嘅问题迟啲答你

无线助理总经理兼邵氏电影执行董事及总经理乐易玲今日（3/8）现身无线电视城出席Show8X网络剧《一念》与微视频《一刻》演员面试记者会。对于推出首届网上演技训练班乐小姐表示：“始终我哋都想揾一啲新血，呢个都系我哋嘅想法，如果唔系𠮶啲现有嘅演员，咁唔系净系一路睇住佢哋，观众都希望有啲新面孔。”

（会否安排黄心颖参与拍摄网剧试水温？）乐小姐直言：“咁又未有咁谂，我都曾经有个念头都想约佢出嚟倾下偈见下面，但系因为疫情关系，因为而家个个都唔系好想出街，咁等冇咁严重先啦。（有冇同佢电话联系？）我哋都有WhatsApp 沟通，但我又好想见下佢，睇下佢而家嘅状态。（佢心情沈淀咗未？）我哋冇提起个件事，佢个人一向都好正面。（无线几时会将佢解冻？）咁深嘅问题我迟啲答你，要同佢倾清楚，又要同公司倾清楚，亦都要谂下而家，俾佢出嚟嘅话，系帮到佢又或者系害咗佢？（感觉得到乐小姐一路都冇放弃过佢！）都唔应该放弃佢，人人都做错过嘢，要睇下佢错嘅嘢有几大啰，睇下仲有冇得重新嚟过，但呢啲都要天时地理人和。”