【新冠肺炎】新城员工确诊　薛家燕已做检测：暂时未有结果

本港娱乐圈再添一名新冠肺炎确诊患者，新城电台于Facebook专页公布，有员工初步确诊，据知正正系知讯台执行总监程凯欣，新城所有员工需要撤离并进行大消毒。薛家燕系新城节目主持之一，佢囡囡石祐珊指已经知悉事件：“已去做咗测试暂未有结果。”

薛家燕逢星期六下午，主持新城节目《开心大派对》，对于有电台员工确诊，家燕姐囡囡石祐珊代回应：“自从上星期知有确诊歌手去过电台，新城都安排所有员工去CHECK，家燕姐都去做咗测试暂未有结果。佢自己无接触过当事人，但因为曾经去新城工作同埋都有去TVB录流行经典，安全起见都系去检测咗先。电台当日亦即时叫唔好返电台，呢个星期都系改录音，今日知员工确诊都要再等指示睇之后访问系咪都录音。至于TVB都系本身星期二有录影都取消咗，等明朗啲再决定下次录影安排同日期，希望确诊人士都尽快康复。”

至于7月10日曾到新城电台接受访问嘅雷有辉，知道有电台员工确诊都表示：“听到消息都吓一跳，我喺10号上过啤梨节目，要有事都有事啦，所以呢排都冇出街，屋企录歌同听黑胶，为健康忍吓都应该嘅，希望疫情好快成为过去。”