【DSE放榜】33分邓卓殷自爆弱点：DSE有科成版无做

2020年香港中学文凭试（DSE）今日放榜，全港共有4男3女7科5**状元。成绩好固然开心，但未如理想亦要勇敢面对。当年DSE考获33分嘅港姐邓卓殷Amber，喺IG直播同DSE考生打气：“唔同分数有唔同出路，唔一定高分出路先好。”并分享当年考试时有一版试卷唔记得做嘅惊险过程。

理科出身嘅Amber分享当年读书点滴，睇返转头DSE只系人生其中一个小挑战：“考DSE都系17、18岁，都系人生好大嘅一个里程碑，当下会好著紧分数，我同你地讲唔好咁紧张都唔会帮到啲咩，因为你地系人生大事呀吗。当睇返转头可能入咗大学一个月，已经唔记得DSE成绩。DSE其实系一把人地去量度你嘅呎，成绩高低都好睇题目，作文又好主观无得一本通书睇到老。唔系话零分都唔紧要，但事实上低分都有选择，唔系个个靠DSE高分去发展，唔同分数有唔同出路，唔一定高分出路先好。当你收到分数已经系咁耐努力得来，再去决定以后嘅路。”

四科5**成绩彪炳，Best Five取得33分，成功入读香港大学建筑系并以一级荣誉毕业，原来Amber都有一科弱点：“我嘅中文阅读能力其实好差，成绩都相对差，中文最后一篇文言文我成版空咗做唔切，得返一两分钟CHECK返之前嘅卷就算，我咁样都中文作文合格哈哈。𠮶下我当然震惊但其实无伤心，因为临急去答可能都系得一两分，豁达啲去面对。”