李忠希宣布再度离巢　入行22年感叹：希望做啲真系想做嘅事

2020刚过一半，TVB已经有多位艺人陆续离巢，最新一位就有入行多年，曾与郑中基陈奕迅同台夺得“叱咤乐坛生力军男歌手”嘅李忠希，佢喺网上宣布离开工作22年嘅TVB：“转眼过了20个年头。当中有苦亦有乐，世界在变，行头在变，制度在变，公司也在变。”

李忠希其实系歌手入行，1999年当时以李中希之名，凭《太著紧》专辑夺得“叱咤乐坛生力军男歌手”铜奖，金奖同银奖分别为郑中基及陈奕迅。1999年佢加入TVB读第13期艺员训练班，2012年曾转往港视发展，2年后再重返TVB。

接受《香港01》访问时李忠希表示，其实早喺上年已经考虑向外闯：“做左咁多年，公司宜家制度同各方面都改变晒，咁啱又约满就谂住自己仲年轻，不如出去闯下。上个月有剧倾左，自己最想向电影发展，都有同合作过电影公司同监制讲已离开TVB，睇下有无合作机会。家人都相当支持呢个决定，唔系净系得一份工，经济上都唔会太担心。”

问到TVB有无挽留，李忠希指：“我喺度22年，唔计去港视两年，返嚟后发展都唔系太突出，希望出去见下啰，做啲真系想做嘅事。（唔续约公司有无另开OFFER？）唔系唔续我，我无签啫。（会唔会觉得郁郁不得志？）做左咁多年无呢D谂法啦，TVB都无承诺养一世，合约嘅嘢你情我愿，TVB始终人多，年年咁多新人，合约唔啱咪唔续出去试下啰。其实都系暂别，依家有合拍部门可以揾出面演员，可能出年又会合作返呢，行头系圆。”