揽锡热情旧照再被翻炒　彭慧中感无奈：系正常礼仪

彭慧中（Phoebe）昨日（20/6）现身将军澳电视城出席《Big Big shop感谢祭》节目节录。讲到网上购物，Phoebe就话非常方便悭时间，“其实我嘅日常生活嘅日用品及衫裤鞋袜都系上网买，只系揿几个掣，跟住几日后呢就会送到嚟我屋企。有时候因为太过方便，就会买下买多咗嘢，不过买咗返嚟我有个习惯，就会成日着，咁样我会觉得抵返晒。”

对于在英国读书时的热情旧照再度曝光，Phoebe大感无奈，更表示：“其实啲相系我喺参选港姐嘅时候已经曝光过，𠮶啲都系旧相。（呢批相是否令你落选原因？）讲真我当然唔知道实际有冇影响到，我谂点都一定有少少影响嘅。（相中见到你俾男仔锡又揽，大家系咩关系？）全部都系朋友嚟，因为其实外国人揽揽锡锡都好正常，当然大家唔系嘴对嘴啦，而家我见啲喺外国读书嘅朋友，大家见面都会揽然后跟住锡面，呢啲都系一啲正常礼仪嚟啫。（见到呢啲相再度被翻炒，会否觉得讨厌？）都会㗎！觉得Po嚟Po去都系同一样嘅嘢，咁我希望有啲新嘢！可能佢哋太回味我嘅历史，佢哋唔需太怀念我嘅过去。（网民觉得你好野性？）系呀！我都几Wild㗎！𠮶阵时读书嘅时候都几开心，讲真而家人大咗，我紧系唔会做呢啲咁嘅嘢啦!”