严崇天任玛姬MV男主角演床上戏　笑言：可以瞓喺度赚钱都唔错

近年本港歌手想出歌一啲都唔容易，但总有啲有心人坚持唱好音乐。前DJ玛姬继3月翻唱GIN LEE嘅《很坚强》后，再推出第二首COVER歌《传闻》，再次落重本拍摄MV，用人情牌揾嚟前娱乐主播严崇天担任男主角。两个都唔系演戏出身，搞到拍摄时笑料百出。

玛姬透露今次MV有成4个造型，连埋化妆足足拍咗9个钟：“自己虽然系歌唱比赛入行，但近年都系主持为主，无咗出歌频率嘅包伏，希望重质多于量，会拣一啲真系有共鸣嘅歌曲翻唱。自己希望每一只歌都有进步，MV都系，真系放资源心机拍个有讯息嘅MV。”

两个做开主持嘅人，对住成千上万观众主持都无有怕，但拍MV就反而搞到佢地好头痕。严崇天话：“对上一次拍MV已经六年前，本身玛姬话揾我做男主角真系以为佢讲笑。当日喺一间好靓豪宅拍摄，点知冷气坏咗热到痴线。要演饮醉但现场无酒，一入境我就扮醉到跌落地，导演劲唔满意亲自教应该点演。同埋床戏又系唔知手放边度咁，好特别嘅经历，可以瞓喺度赚钱都唔错，多谢玛姬哈哈。”