【瞩目配角】黄泽锋因03沙士生意失败　再遇疫情更感慨：乜都冇晒

黄泽锋：“新冠肺炎其实比沙士更惨。”
黄泽锋曾开设火锅店麻辣小喇叭，开幕时郑伊健也来剪彩，生意由月赚百万，但03年沙士一来到，生意变一落千丈，当时36岁的他，一度想过轻生，他说:“30个伙记当每个伙记出一万蚊粮，都成30万，冇生意人又燥，会有只魔鬼会话你听，你唔得㗎，你喺呢度跳落去啦！”庆幸黄泽锋没有听到魔鬼劝告，坚持下去；今年53岁黄泽锋形容市道比当年更差，但他态度积极，教游水，打拳再拍剧，上年还做了爸爸：“沙士嘅经验我话畀自己知我要平静落嚟，乐观其成，呢期少工开咗，但我睇住我个女成长。”
场地提供：The AIR （The ONE）

黄泽锋1986年入读无线艺员训练班，与郑伊健、谢天华、李家声等人同期，毕业后加入无线先为艺员，正式开展银色旅途。“冇谂过佢会收㗎，𠮶时我180磅，一个大肥仔，𠮶时我个花名系‘肥仔’。”其实黄泽锋在做演员之前，是一名泳坛健儿，曾代表香港出战美国分龄赛事，更屡次赢取香港渡海泳冠军，甚至连第一个演艺作品也是因为游水而得到机会，“因为游水而入港台，有一次我接受电视新闻访问，有个导演话就系想要揾呢个𡃁仔，咁就揾咗我去做，揾我𠮶个人叫做施永远，即系后嚟嘅副广播处长。”

冇人识你呀！

“喺我个年代，游水退役之后得两样嘢做㗎啫，一系做救生员，一系就做教练，咁结果我系选择咗做教练嘅，但𠮶时我十几廿歳，我发觉我唔可以就咁过一世，年纪轻嘅时候就渴望睇多啲嘢，咁我咪去读训练班啰，而个问题系，佢又收吖嘛！”不过入到训练班，泽锋的成绩非常之差，更曾试过考第尾，“佢中途会筛人，点知佢又唔筛，又畀我读到毕业，然后谂住都做唔成演员㗎喇，点知佢又签㖞！结果就喺TVB做咗25年，连埋港台，我加加埋埋喺呢行做咗35年。”不过泽锋却未有因为个人在泳坛的名气而在演艺界得到更多机会，甚至根本没有人认得他泳坛声明显赫的人，“冇人识我系边个，直到我出嚟开始做戏，当时体育世界嘅一个记者发现到，陈常来，佢话：‘呢个系香港冠军嚟㗎，一个好劲好劲嘅人入咗嚟都冇人知’，不过都因为我冇讲畀人听，冇人知我系咁劲嘅。”

惨不忍睹

黄泽锋在TVB当了25年演员，但他演过的角色，却无一个令他觉得满意，反而认为“不堪回首”的却多不胜数：“真系惨不忍睹！例如最初𠮶啲，《人海绿皮书》，我真系惨不忍睹㗎，睇返真系想死，又例如《新扎师兄》，1988年，我睇返我都想死，点解我好似念口黄咁？所有嘢都系念嘅！”的确，泽锋在无线从来不乏演出机会，但很多观众对他的印象却停留在“TVB𠮶个演员，做过好多戏”而说出名字。2012年，泽锋决定离开TVB往外闯，加入了“HKTV”，可惜视台却胎死腹中。2019年，黄泽锋参演ViuTV剧集《教束》，饰演一名体育科主任，一名长头发，脸长胡须的老师，“我问过导演㗎，佢要我做体育老师，但我长头发㗎㖞，有胡须㗎㖞，佢话得，紥起把头发啰，咁大家观众觉得好睇，咁咪开心啰，咁我睇返都觉得几好笑，呢条友都几离谱。”

经历沙士 跌入人生低谷

自认演艺才华一般，现时泽锋主要以教水、教拳以及拳赛评判维生，幕前演出是“时间许可”的工作，基于不影响自己的课堂为前题。然而2020年1月开始，新冠肺炎肆虐并蔓延全球，运动场、泳池等公共设施勒令停开，泽锋的生计大受影响：“好坦白讲，喺过去呢十年，我未试过停落嚟两个几月，除咗年初四我开过一日工，年初五就封池喇，然后我到而家都未开过工。”幸而，泽锋在这段期间获“开电视”邀请主持节目《我的志愿速成班》，总算叫有工开。其实2003年的沙士曾经亦将泽锋打入人生低谷，所以面对今次新冠肺炎来袭，他尤其感概。2002年，黄泽锋与邵传勇、骆达华及几位圈外股东合资，在尖沙嘴开设“麻辣小喇叭”火锅店，起初有明星效应生意不俗，但直至2003沙士来袭，生意一落千丈，最终更导致结业收场。

“沙士嚟到嘅时候，我系好六神无主㗎，我当时做紧生意，咁但系就成条街都冇晒人，𠮶时我30几岁，我冇遇过呢啲咁嘅情况，每一日都好焦虑，好燥底，脾气一定大，生意又唔好，我差不多要养卅个伙，坦白讲，每人一万都要卅万，好快就一个月㗎喇，咁就要好辛苦去追，到最后都系输晒，一无所有，好感概，我觉得沙士我系最惨㗎喇。”火锅店倒闭后，泽锋的财政状态出现严重赤字，欠债累累，精神状态跌入谷底，“做生意𠮶时，我原本打算演员𠮶方面唔好揹得咁重，倒不如做生意自己唔洗咁辛苦啦，咁但生意完咗之后就乜都冇喇，个人都癫，由渣车返工到后来都系巴士咋，𠮶时我住深井，放工返屋企我要两个半钟，个人系好Down，点解咁呀，（𠮶段时间有几长？）我谂有成4、5年，最惨系，总有只魔鬼会话你听，你唔得㗎，你喺呢度跳落去啦！”

“沙士嘅经验我话畀自己知我要平静落嚟，乐观其成，到2008年再嚟个雷曼兄弟，当时我完全冇事兼有钱赚。”事隔17年，泽锋的生计再因为疫情而严重受影响，但他并没有像当年一样沮丧，反而将停工的时间视为见证女儿成长的珍贵时光，“好彩我呢段时间陪住佢，因为佢而家未到一岁，呢几个月好多唔同变化，今次呢个疫情令到我可以坐定定，又唔去得街啦。”黄泽锋与太太陈丽丽在2010年结婚，当时二人亦已年过40，一直都希望生育下一代，但苦等多年，亦未见有起色：“头𠮶5、6年都好渴望有嘅，到后期我哋都接受咗冇就冇啦，就算月经迟咗㖞！我都会觉得算啦！我唔想空欢喜，直到一刻，成个世界平静落嚟，咁就有咗。”现时黄泽锋自命拥有一个幸福、完整的家庭，即使再次受尽疫情影响，他仍然能够处之泰然，从经验中学习“做人”，“调返转头，我谂返起我沙士嘅时候我乜都冇晒，好惨，否极泰来，如果我当时我真系谂唔开，跳咗落去，我唔会有今日。”

后记:2020年，新冠肺肆虐全球，各行各业面临数个月寒冬，收入大降，“零收入”人士多不胜数，疫情之下，记者要约专访实在不容易，餐厅位减少、各主题房、场地被勒令关门，“聚会”人数亦有上限，专访场地短缺。幸而，公关几经辛苦，从相熟商场借得“室外”场地，专访才能顺利举行。