【叹息桥】林保怡唔受高薪引诱　拒返无线拍剧：我比较着重创作

由林保怡（Bowie）第一次担任监制的爱情悬疑剧《叹息桥》将在下周一（11日）晚上九时半在ViuTV播出，他谈到这个计划两年前就开始筹备，中间经过很多协调；与做演员的不同之处在于：“以前冇我嘅戏就会收工走，而家就由朝早到夜晚、会同所有演员去沟通。”这也是Bowie与周家怡继2016年的《玛嘉烈与大卫系列 绿豆》后再度合作，他就说角色与上次截然不同：“今次我演Thomas系比较内敛、施恩不望报、亦都唔系好识得去表达爱，惊表白完会失去对方，会好纠结。”

《叹息桥》28/3率先在内地视频网站优酷上架，并在著名影视评论网站“豆瓣”获得8.8分，超越无线的口碑之作《金宵大厦》，林保怡说：“多谢观众畀我哋嘅评分，因为真系睇完之后嘅评价，好开心《叹息桥》都算为港争光！”Bowie又希望为港剧做些事：“我觉得系时候做啲嘢、应该做啲嘢，又啱啱好遇到两位导演（肥波、二五），所以可以实现呢个梦想，希望下部作品都可以维持高分。”至于会否觉得较无线优胜，Bowie就说：“冇话赢定输嘅，唔会系竞争，希望每个镜头、每句对白都可以帮助观众去拆解呢个爱情悬疑剧。”无线现时亦正在播放重磅剧《降魔的2.0》，问到会否有压力，Bowie说：“其实TVB有同我讲，佢哋8:30，我哋9:30，咁就啱啱好，睇完呢到睇𠮶到。”

林保怡自1991年起于无线拍剧，更在2004年凭《金枝欲孽》夺视帝宝座，2011年离巢；在无线的时间逾二十年，谈到若然无线找他回去拍剧，Bowie说：“其实我哋开放嘅，但最主要系所有嘢都系100%原创，我唔希望有任何Party去修改，要真系我哋嘅作品。（即现时与ViuTV的合作模式）”至于只是找他回去演戏，Bowie就摇头表示拒绝：“我唔会喇！我而家比较着重创作，一定要有好剧本、好角色、好团队先会做到一啲嘢，缺一不可！（即使酬劳好吸引？）都唔会喇！”

林保怡相信观众会为了解迷而再度翻看：“电视播完直播，我估大部分观众都会喺Apps重睇一次，始终爱情悬疑剧唔会睇一次就明，可能睇两次、三次。”Bowie又对收视率不太感到压力：“由头到尾，我以前喺TVB都冇乜压力，廿几三十年我都系咁样，我谂只要用心、尽全力去做，就唔好计较成果系点；如果失败都要接受，咪去改变，揾出点解失败、再接再厉！”Bowie又说制作公司是他的宝贝，团队内的大家都仍在学习中：“我哋成日都睇好多戏，可能会好慢，但慢工出细货嘛，有啲写紧嘅剧本都唔知写到第几稿了！”