【东张西望】港女透过交友apps堕杀猪盘陷阱 　半年被骗逾200万

内地近年兴起杀猪盘骗局，单系去年金额已经有38亿。之所以称为杀猪盘，系因为内地骗徒交友APP、网站称之为“猪圈”、透露网站去结识异性嘅使用者为“猪”。
其实早在二月时有本地媒体报道过有港人受骗，损失逾176万元，但依然继续有港女坠入骗局，昨晚播出嘅《东张西望》中，化名K小姐嘅本地单身女子受访时，表示今年初透过交友apps识咗一名内地男子后，对方除表示在感情路上受挫之外，又话自己细细已经出嚟赚钱养家。“佢话透过交友apps识到我好幸运，过程中佢好关心我，但so far到而家我都未见过呢个男仔。”虽然K小姐同内地男友素未谋面，但原来佢已经先后为被对方氹入局而问银行同财务公司借款200万……

内地男子都几认真，用WhatsApp同K小姐甜言蜜语。
 

据K小姐所讲，内地男子喺二月初时叫佢摆钱入一个名为恒益贯嘅apps之中，并将现金转成虚疑货币，之后内地男子又再介绍一个“智富宝” apps，并指apps与多间银行合作，盈利率高达九成。K小姐称：“好似赌场买大细咁，几分钟开number，我就利用呢几分钟去决定买咩。”喺内地男子嘅指引下，K小姐确系赢多输小，令佢更不疑有诈。去到今年情人节前夕，内地男子再度出招，诚邀K小姐连续九日存款到一个户口，并在第十日时全数取回款项，由于每次存款平台都会按比例送出虚拟货币做花红，利用花红买大细，如同无本生利一样。“男仔觉得呢个活动好有意义，因为今年先识，亦将大家户口LINK UP，可以对我作出承诺。”呢个承诺一啲都唔平，因为K小姐要存入130人仔，而内地男子则自称要存入520万。

为咗呢名内地男子，K小姐最终同银行借钱，可惜系当佢准备喺第十日取回款项时，被告之原来要先作出同金额消费。喺呢个时候，内地男子向K小姐表示想买楼建立幸福的家，叫佢加码200万，喺甜言蜜语嘅攻陷之下，K小姐向财务公司借款75万……直到某日，K小姐睇新闻发现“杀猪盘”先知出事，但佢话：“我仍然深信佢系钟意我，佢嘅daily life同正常人一样，我除咗无见过佢、无讲过电话，其他嘢我觉得同一般情侣一样。”K小姐得知自己受骗之后，未有揭发对方，原因系希望可以将对方捉拿归案……