【美女郊游游】陈欣妍宁食屎都唔敢玩飞索　泪涕俱下求放过

最新一集ViuTV真人骚《美女郊游游》，讲到“Double S”沈殷怡（Shirley Sham）和陈欣妍（Shirley Chan）坐船去跳岛（即系坐船去完一个又一个）。陈欣妍喺上船无耐就已经呕到七彩，真系我见犹怜。去到有“海上宫殿”之称嘅横洲，由于天气唔适宜船只泊岸，所以一行人只能远观，Double S即时开心到拍晒手掌。

由于跳岛实在太闷，所以一行人去到东龙岛后，导演就提出玩飞索，沈殷怡睇完飞索起点，即时表示ok，反观陈欣妍就拧晒头。上到山崖之后，陈欣妍访问时表示因为峡谷关系，所以觉得好恐怖，有感自己随时会掉下去，加上旁边系海，所有最惊嘅嘢都集埋晒一齐。

睇住沈殷怡轻松著上装备之后，陈欣妍口都震晒咁表示呢个环节自己唔出镜都无所谓，见到沈殷怡准备飞时，陈欣妍就话：“摄影师系未叫我食屎？我宁愿食屎都唔想玩呢个。坦然自己由细到大有咩就会即时放弃嘅陈欣妍，最终扣上安全带和戴上安全帽，但就系咁问：“点解日日都要玩呢啲嘢啫？”
 

去到崖边后，陈欣妍喊到鼻涕直流，又频频叫工作人员唔好迫自己，工作人员提佢转身返回安全位置，点知陈欣妍惊到乱晒，仲话：“我就系转唔到，如果好似Angry Bird咁弹咗出去咁点算呀？”由于陈欣妍未能克服自己的心理障碍，所以导演安排团友阿Dee做替身，代佢飞过峡谷……节目播出之后，唔少网民都留言表示想睇陈欣妍食屎多过佢飞索，亦有留言问系未因为食咗屎，所以唔使上阵。
 

点击重温陈欣妍激动场面！