【够细奇则】300呎开放式单位仲要请工人　一眼望晒点生活？

开电视节目《够细奇则》每集都会介绍香港各区“纳米单位”，无论系169呎住4大人单位，定219呎无睡房但有大花园单位，都足以令观众叹为观止。最新一集，节目去到位于筲箕湾嘅全新装修单位。

呢个开放式单位有成332呎，对于两夫妇来说可以话非常够用，设计师喺客厅分成上下两层，上层当然系主人房，并以透明玻璃当作围栏，好似好有情调咁。而主人房嘅下层，设计师话因为主人喜欢叹茶，于是喺偏厅位置整咗一个较高身嘅地台，而当中更有一个可折合嘅茶机，听落呢间屋嘅屋主真系好识享受。不过，咁都仲未够，因为呢个单位除咗两公婆之外，仲有一名家佣姐姐，而姐姐嘅睡房正正就系上层主人房对落嘅偏厅位……而主人房是用透明玻璃分隔的，而地台又无遮无掩，唔少网民都觉得非常之唔方便……就连嘉宾盖世宝都话：“咁样好似一齐瞓咁……”

除咗透明主人房奇怪之外，其实如果细睇的话，偏厅地台亦都好出事。因为地台有两级楼梯之高，要行出露台的话都几唔方便，于是设计师将其中一级楼梯设计成可拆式，仲话方出露台会方便啲，但问题系次次出入都要拆同装，会唔会更唔方便呢？