【Netflix 极速求生】就算唔识揸车　一样睇到热血沸腾

Netflix《Formula 1：极速求生》 台译《一级方程式：飙速求生》钟意车、F1粉丝唔驶讲一定睇，但如果你同我一样唔识揸车，平时对车一啲兴趣都冇，直头汽车白痴，呢套纪录片你一样觉得好睇，因为车手之间嘅斗争好似《权力游戏》咁好睇，赛车场面尤其第一身画面，令你置身f1车厢一样，睇到你手心冒汗。刺激程度拍得打赛车game!

见到你攞奖，我想你死

从来觉得赛车好闷，成班男人围住条马路飞来飞去又嘈，唔知为乜，呢套纪录片啱哂你，用型到裂嘅画面，再加戏剧性嘅情节，话你听Ｆ１世界系点，就系冠军只有一个，无论车手、车队，唔止要争第一，第五六七都要争，总知见你低过我，我就心凉，唔会有八婆嗌交，男人斗争一落场死过，你会见到每位车手都系天才，斗嘅系稳定性同心理质素，边个犯一个微少错误，就会失去冠军、就系输家。特别喺第一季第三集《挽救》，呢集讲红牛车队当时有两大好手Daniel Ricciardo同Max Verstappen，(哗!唔识㖞，好离身?放心，睇第一集你会识哂所有车手，佢哋IG你会follow埋)，观众好快知一山不能藏二虎，Daniel仔当时系红牛一哥，Max系天才后起之秀，一直想抢Daniel位置，点知喺摩纳哥分站赛前练习，就系犯咗一个小错撞埋栏，连排位赛都冇份玩，之后眼白白睇住队友攞冠军，自己喺台下为人拍掌、强颜欢笑，𠮶样酸到呢......影帝都做唔到嘅表情。

法拉利、Benz第一季唔肯玩

Netflix 极速求生虽然第二季已上架，但唔驶担心要由第一季睇起先，两季入面求其拣一集开始都唔系太大问题，第二季最好睇一定系第四集《Dark Days 乌云笼罩的日子》，呢集主角系年续6届车队冠军Mercedes AMG Petronas Motorsport，简单嚟讲就系Benz，当你以为揾到6届冠军㖞，呢集梗系疯狂吹奏啦，唔系㖞，其实喺第一季Benz同法拉利系好少镜头出现，包括咸美顿都系得几个镜头，𠮶阵都觉得怪怪地，点会讲F1冇两大龙头呢?睇返其他报导讲，原本两位大哥唔系好想被人拍，所以第一季冇睬Netflix，点知第一季好成功，跟住法拉利同Benz先肯第二季一齐玩，Benz车队总监Toto Wolf其实都唔系好想俾Netflix拍，但适逢赛车运动125周年又系德国站，就俾佢哋拍一集点知就出事喇....

“事情搞砸的时候，人总是会想要抓出战犯”

首先Benz车队连攞6届总冠军，车手Lewis Hamilton 同Valtteri Bottas世界排名第一同二，呢个屈机嘅阵容边有得输，但世事就系咁奇妙，Netflix就系拍到Benz难得输嘅一场，亦系呢集好睇之处，你会见到赛车呢样咁精密嘅运动，无论车手有几咁世界级都好，只要你𠮶队有一个人做得唔好，维修员换呔慢少少都会令你输，呢集正正系最好写照，一场雨战，威美顿开首原本大好形势，领先第二6秒，赛车世界每小时300公里时速，6秒基本上绝大优势，点知咸美顿突然跣呔，撞烂车头鼻翼要入维修站更换，入维修站平均系两秒搅掂，但维修工作人员竟然换错鼻翼，原本要换16号但换咗76号，结果一拆一换，咸美顿一分钟后先驶出维修站，由第一跌落第十二，冠军冇咗，世界排名第二队友又输埋，Benz谂住喺Netflix有段片威下，结果变输家，睇人X街系最开心，尤其系长胜将军败绩，Benz CEO Toto  Wolff对呢次败仗当然失望，但佢有句对白好正，“When you screw up , you want to indentify the person ,It's how the human mind works,but we have a no-blame culture,we blame the problem rather the person。(事情搞砸的时候,人总是会想要抓出战犯，人的天性是如此，不过我们有一套“不怪责”文化，我们针对问题本身而不对人。)你可以话有镜头拍住，梗系咁讲啦，但肯做戏又有几多个，俾著香港啲老板，仲唔30字粗口闹头先换鼻翼𠮶班人咩?输咗场比赛仲未完㖞，事后出席记者会仲要俾记者寸，“你心情系咪好差?netflix拍紧你㖞。”难得呢位CEO仲可以以柔制刚，认真犀利，

你可以话有镜头拍住，梗系咁讲啦，但肯做戏又有几多个，俾著香港啲老板，仲唔30字粗口闹头先换鼻翼𠮶班人咩?输咗场比赛仲未完㖞，事后出席记者会仲要俾记者寸，“你心情系咪好差?netflix拍紧你㖞。”难得呢位CEO仲可以以柔制刚，认真犀利，睇人有几劲你未必学到嘢，但究竟成功人仕点样面对失败，唔系埋怨，而系以正面态度找出错误原因，心态决定境界，或者呢个就系Benz点解连夺6届总冠军嘅原因。