【辣伙头】邓月平连过15关成首届女厨神：得到大师认同系好开心！

ViuTV煮食综艺节目《辣伙头》28日晚播出决赛，晋身三强嘅邓月平（Larine）、陈欣妍（Shirley）及余逸思（Yoshi）需于两个钟头内完成包括头盘、主菜、甜品嘅套餐，结果赛前大热嘅Larine成为首届女厨神赢得冠军，当场开心到跳起，更揽住苏菲以及郭奕芯等激动落泪。

Larine三道参赛菜式分别为：头盘中式煎带子伴分子大红袍橙汁、主菜辣味猪腩肉Pasta，甜品芝士伯爵菜蛋糕配四川幸运曲奇，相当创新，原来佢系以自己作为菜式主题：“因为我喺比赛入面曾经迷失过，但我撑落去，而今次嘅主题系我，第一道𩠌系我畀人嘅感觉，第一啖食落去冰冰凉凉，我第一个畀人嘅感觉会系咁，但认识我嘅人系发现我热情如火，所以我整咗个辣嘅意大利饭，到最后其实我都有Sweet一面。由于一开始我用咗茶，就特登喺蛋糕里面加咗大红袍茶同埋伯爵茶去呼应返头尾。”

不过比赛中途，主持兼评判陶大宇指Larine整嘅猪皮唔够脆，Larine听到后即露出失望表情：“宣布赛果前好紧张，评判对我哋三个都有赞有弹，我听完个弹之后，觉得摧毁咗我成个人，当下就跌咗落地狱，到之后宣布冠军𠮶阵，又由地狱上返地面，𠮶下感觉都有啲空白。”

连过15关打赢7个对手才登上冠军宝座，Larine说：“得到呢个奖要多谢Christian（主持杨尚友），我记得佢喺比赛第五、六集𠮶时同我讲，睇好我系冠军，我知道佢喺法国学厨多年，得到呢位大师级认同系好开心，亦都好沉重。拍摄期间，密密麻麻嘅拍摄期，每日拍十几廿个钟，其实台前幕后都好攰，虽然冠军只有一个，但我觉得呢个荣耀系属于他们我们你们。”

参加《辣伙头》后好多朋友及粉丝都问 Larine 拎食谱， Larine 亦决定开 YouTube Channel 继续分享其煮食心得：“同埋我都同出版社倾紧出食谱，希望一次过满足晒两个愿望，又满足到大家嘅愿望啦，最近亦都有牌子想同我一齐研究酱汁，我觉得呢个都系喺我未做到所有嘢之前，可以畀大家快啲试到平平嘅手势嘅方法。”