【早霸王】大女友25年怕拖累主动提分手　森美：咪讲到好伟大咁

适逢情人节，又遇上《早霸王》嘅“你知道唔知道有人挂住你”环节，想表白都好合情合理。不过男听众阿肥就话自己两日前同女友分手，但系未想藉节目打去道歉求和呢？佢又话唔系㖞……

至于分手原因，本身做地产嘅阿肥话有感自己俾唔到稳定生活对方，为免浪费对方时间，所以主动提出分手。“佢系好踏实嘅人，要求好简单，希望系两个人都揾到钱维持生活，但我俾唔到佢。”听到阿肥指前度希望可以有二人世界，森美同小仪都话身边有唔少朋友，结婚十几年仍然系同老爷奶奶一齐住，“二人世界”并非简单而系奢侈。

阿肥又话前度曾经有怨言，但当森美问到“佢有无话因为你穷，所以唔钟意你？”时，阿肥只系话前度曾因有感实现唔到有个好嘅生活环境而落泪，系森美再三追问下，阿肥承认自己系懒散。森美表示：“好多男人都会搞错，人哋飞你，唔系因为你穷，而系因为唔上进。”又提阿肥怕拖累对方而主动提分手，完全系“讲到自己好伟大咁”

问到想藉节目挽回前度心意定系想揾新女友时，阿肥即时“缩沙”，并谓“都系做好自己再打啦。”小仪提议可以先作出承诺先，阿肥亦即时拒绝，并表示：“本身系想叫佢比少少时间，好让我做到对佢所承诺佢嘅嘢，但同你哋讲完之后 我都未做到，所以都系唔打。”阿肥表示自己本身喺外国画漫画，但因为难以为生，加上屋企人相继生病，所以佢先返香港并转行做地产。“最大问题系我大佢25岁。”森美认为年龄并非最大问题，并指本身系艺术家嘅阿肥，根本唔适合做地产，强烈建议佢转行：“同埋爱情上，你要坦白同佢讲你的问题，等对方选择，而唔系你帮佢拣埋，要沟通多啲。”