【武汉肺炎】代莲曦丹美海口探亲自困三层豪宅　回港自我隔离14天

武汉肺炎肆虐，港府由今日凌晨起要求所有从内地入境人士，强制接受检疫14日，农历新年前往海口探亲嘅代莲曦丹美（Daisy），几经艰辛扑机票，终于赶及实施强制检疫前返港，而Daisy回港后亦要留喺屋企自我隔离 14 日。

2月6日Daisy 由海口飞返香港，当日机场入境者特别多：“𠮶日入境要量体温，填健康申报表，但特别多人，同埋feel到气氛系好小心，个个带晒口罩。香港始终人口密度高，尤其机场系集中全世界唔同人嘅地方，虽然呢次入境比平时用多咗时间，但都系应该。”

Daisy家人分别喺德国及海口居住，呢次佢到海口探望长辈，喺逗留嘅两个星期内，只出入过两次，就系由机场去屋企、再由屋企出机场，整个新年困喺屋企，而且度岁著嘅新衫亦只系一件睡衣。Daisy 话：“为咗过年，我指甲gel 咗，头发 treatment 整咗，新衫买咗化妆品准备晒，点知系一件睡衣喺海口嘅屋企过完成个新年，我全程冇出过屋企，唯一一次出屋企系直线去机场返香港，呢次真系由细到大过得最特别嘅一个新年。”

虽然自困海口寓所，不过来自小康之家嘅Daisy，住所有成三层，可以喺一楼饮咖啡、二楼饭厅开餐，三楼闺房瞓觉，更将呢啲家中“景点”分别美名为“客厅岭”、“沙发滩”、“餐厅美食街”、“枕头山”。