【武汉肺炎】汪明荃缺口罩获粉丝送暖　网友：基层同长者点算？

武汉肺炎疫情下人心惶惶，怕出街一不留神会染病，但每日都喺街上见到唔少人龙，寒风下排队都系为咗购买口罩，当中有唔少都系老人家，令人相当心酸。估唔到连汪明荃原来都缺乏口罩周围扑货，有网友不禁留言话：“连Lisa 姐都缺乏口罩... 你话香港嘅基层同长者点算呢？”

汪阿姐连日来都有继续外出，早前仲因为赶时间乘搭铁路，每次出外都有戴好口罩，但原来佢自己都已经存货不多，呢日佢拍片表示：“台面见到就系一啲口罩，我真系好好彩，因为我啲朋友来自世界各地，佢地都知我缺乏口罩。我预计自己一日用两个已经最少，因为我成日要出去开会周围走，除咗就唔可以再翻用，如果一盒得10个，5日已经无晒，所以我继续揾朋友睇下有无口罩可以帮我买到。”

汪阿姐正确示范点使用口罩，但一日用两个口罩令库存相当紧张，令佢都有啲担心：“家英哥去咗马来西亚拍戏，我以为𠮶度无咁严重，点知佢话一个都无，因为新加坡都有啲个案发生，所以当地都好紧张一个都无得买。”好在最后有新加坡粉丝及时送上两盒口罩俾佢应急。不过都有网友概叹：“连Lisa 姐都缺乏口罩... 你话香港嘅基层同长者点算呢？”