【武汉肺炎】薛家燕学校被指停课安排失当　石祐珊：文字沟通有误

因应武汉肺炎愈趋严重，中小学及幼稚园已多次延长春节假期，停课避免大规模传染。香港小朋友除咗返学校，亦出名多兴趣班，课外活动嘅停课安排亦受到家长们关注。薛家燕开设嘅艺术中心，多年来培育唔少童星，不过有家长就投诉呢次疫情下中心安排。身在外地嘅薛家燕囡囡兼经理人石祐珊接受《香港01》访问时表示：“应该系文字上沟通大家理解有出入。”

有“妈妈谷”这两日疯传某家长分享，指自己报咗家燕妈妈课程一肚气：“而家武汉流感高峰期而课程延期，延到4月，我哋已经移民离开香港，唔畀退款，唔畀转畀其他朋友，一定要我喺移民之前夹硬揾多几日去上堂，或者之后再加钱报下季Course，再唔系白白Waste咗三堂钱啦！我谂如果为咗想做星妈，可能好多人都会忍。但如果只系想畀小朋友玩下，练下胆量，真系唔好拣呢间。”

就呢件事石祐珊接受《香港01》访问时表示：“我人在外地，已经揾同事了解，佢哋之前一直同呢位家长Whatsapp沟通，因为本身条款上的确写报名后冇得退款，可能文字沟通上有误会，令到佢唔开心。同事已经直接打电话同佢联络，双方沟通清楚已经解决。”

睇返家燕姐间学校嘅官方社交网站，最后一次更新系一班学员同家燕姐录影TVB节目《开运王团年迎金鼠》，而学校亦跟随教育局停课指引，将所有课堂都暂停。石祐珊话：“其实呢段时间我哋已经停咗课，损失方面大家都好大，但始终安全最紧要。本身两星期前已经同妈咪讲不如呢一季课程推迟，但佢真系好钟意见到班小朋友学得开心，唔舍得一刀切暂停，估唔到疫情发展得咁快，而家都会睇返教育局𠮶边安排再决定课程方面点处理。”

3月30号系家燕姐70寿生日，珊珊都透露本身早已准备盛大派对：“本身三月尾准备同妈妈搞70岁Party，都有预班小朋友表演，而家都要睇定啲先，所有嘢已经Book晒，但都要睇情况先决定系咪继续。”