【武汉肺炎】倪晨曦月尾婚礼或延期：大家嘅健康最重要

近日唔少酒楼宣布因为武汉肺炎疫情严峻，大量宴会取消令生意大受影响，需要员工放无薪假。倪晨曦（Elva）原定今个月26号同圈外男友喺香港注册兼举行婚礼，但因应疫情，佢接受《香港01》访问时表示：“改期真系要考虑好多嘢，当然大家嘅健康最重要。”

原定于去年年尾举行婚礼，延至2月尾，点知又遇上武汉肺炎，Elva都表示已作最坏打算：“婚礼主要都系多伦多屋企人，因为本身打算七月会喺南京摆酒，所以本身内地亲友都唔多。呢一刻其实真系未落实系咪延期，只系有考虑过呢个可能性，始终真系婚礼改期真系要考虑好多嘢，呢几日会密切同未婚夫屋企人同埋自己屋企人沟通，了解佢哋嘅意愿，当然大家嘅健康最重要，希望过一个星期，因应疫情嘅情况，再尽量作出最妥善安排。”

为咗工作及筹备婚礼，Elva无可避免需要外出，但佢都面临无口罩可用嘅情况：“口罩存量之前系近乎零，但系唔心急唔恐慌，最多就系少啲出去，之后有朋友都好好咁俾咗啲我，我都唔敢要得多，10个8个存量就够，留返俾有需要嘅人，出街嘅时候带多一个喺身，见到冇口罩嘅公公婆婆都可以略尽绵力比一个佢。”

而工作方面亦有受到影响：“本身而家我应该喺巴黎出紧Trip做野，但系因为疫情关系所以取消咗，情人节会飞伦敦时装周，如无意外会照去。另外试业中嘅Yoga Studio都因为疫情关系所以开张日期都延迟左，仲未定到确实开张日期。”