【武汉肺炎】禁制令菲佣返港无期　区永权成为“姐姐”爱的替身

武汉肺炎疫情全球肆虐，各地陆续有确诊甚至出现死亡个案，菲律宾喺2月4日突然实施禁令，宣布暂时禁止菲律宾人到中港澳，令到逾千菲佣滞留，唔少港人家庭大受影响，区永权一家亦因此相当烦恼：“要暂时成为‘姐姐’嘅爱的替身！”

区永权一家同好多香港家庭一样有聘请菲佣，早前一家四口到北海道滑雪，家中工人姐姐亦趁机返菲律宾探亲，点知就遇上禁令，区永权话：“回港后处理第一件家中大事：‘姐姐’返港遥遥无期！话说外佣姐姐原定今日从菲律宾探亲后回港，谁（殊）不知姐姐昨日来电，话回港航班已取消！本以为系某些航空公司嘅处理方法，于是漏夜订一张其他航空公司嘅全新机票，令姐姐可按原定计划今日回港。点知航班照飞，但‘姐姐’未能登机，原来菲律宾已决定禁止民众乘航班直飞香港，亦未知此禁令将到何时？所以‘佣入家中’一幕，将会于本人家中⋯⋯不日上映！”

虽然区太系全职妈妈，但菲佣姐姐回归无期，生活始终会大受影响，区永权就好正面咁话：“正因为近排嘅对外工作，不是延期，就是取消，所以令原本忙到甩辘嘅二月，突然可以腾出更多时间！宜家多出嘅时间除咗返工，就系要做凑仔公，甚至做伴读书陪仔做停课期间嘅网上功课！而对区太而言，最安慰嘅，就梗系有个人可以暂时成为‘姐姐’嘅爱的替身，帮手⋯⋯做！家！务！”