李国麟为同事发声表不满　急开记招拆弹：自己用错咗方法

有“绿叶王”之称的无线男艺员李国麟（窿哥）早前接受《香港01》的“触目配角”专访，大谈过去四十多年在无线打拼的日子，亦对公司近年的制作及一年签六个骚政策大表不满，访问出街后有极大的回响，有网民留言大闹无线冇良心，亦有网民闹爆窿哥一竹竿打翻一船人，说话欠公道，反应两极化。

【瞩目配角】李国麟爆绿叶要去𢯎捞：有人叫我哋多啲去揾监制倾偈

【瞩目配角】李国麟叹TVB剧冇进步：如果离开咗，我都会闹埋一份

今日（23/1）窿哥就此事开记招道歉，承认在专访中忽略了其他人的感受：“喺个访问中，自己当时就好似火山爆发咁，将咁多年积系心里面嘅郁结讲咗出嚟，𠮶阵时我净系讲一啲负面嘅嘢，冇讲正能量嘅嘢，我觉得自己系唔啱，因为啲言论好影响一班好用心嘅制作人，我嘅言论系抹煞咗佢哋，其实我嘅出发点都系想反应畀公司知道而家有咩问题存在，我承认自己用错咗方法。”

提到担唔担心此事影响续约？窿哥直言：“如果呢件事影响到嘅话，自己都要检讨下，亦代表我喺市场上冇价值，佢哋要清楚知道我嘅出发点系为咗咩，如果我系踩公司，又冇养育之恩，呢个人就抵炒，我每次工作都好全心全意，我真系好爱呢间公司，如果佢哋觉得我在市场上，可用性不高唔用我，我都冇办法。”问有否为言论感到后悔？窿哥坦言没有后悔，但日后会在说话上更警惕，会深思熟虑后先讲出口。