【网红猎人】Pumpkin Jenn直认KOL钱易赚　月入6位数：唔系秘密！

“Hello，大家好，好多谢大家又揿入嚟睇我条片喇！”相信有留意香港美妆YouTuber的朋友对频道Pumpkin Jenn这句开场白并不陌生。现年25岁的Jenn在2013开始发布第一条影片，至今已推有超过21万订阅者。月入六位数的她，最近更与闺密Tawnia一同投资过百万成立自家护肤品牌“WOKE UP LIKE THIS”，到底YouTuber真的那么好赚吗？

身为一个美妆Youtuber Jenn不时都会分享护肤和化妆技巧，当中教大家穿搭的片亦相当受欢迎。人人都知道娱乐圈人红是非多，其实在KOL的圈子亦一样。Jenn由拍片开始，多年来都是网民狙击的热门目标。Jenn接受《香港01》访问时对此亦直认不讳：“当然好难受，话就话俾人闹咗5年，但我又唔可以单一方面怪责人哋闹我，因为摆得自己喺网上面都一定会预咗。当然有好多嘢自己可以处理得好啲，又有好多事情如果唔系呢个身份可能就唔会俾人闹？当然你有呢个身份嘅时候就有呢个责任。其实都系慢慢去学……其实我都真系好唔开心，尽量唔睇或者学吓点样避免唔好做傻猪嘢。”

面对网络攻击　Jenn最怕连累家人：我好自卑

面对网络暴力，最令Jenn情绪崩溃就是连累家人，她讲道：“其实每一次都唔开心，但最自卑应该系屋企。因为我读𠮶间大学学费都几贵，咁我身边朋友都系出身背景都几好，对比起自己会有少少出入，因为屋企人做嘢系非常之辛苦，又唔系特别有钱。而且我系单亲，爸爸系意外过咗身。呢样嘢其实我已经好自卑，其实我系知道呢样嘢，所以每一次网民去特别攻击或者睇唔起我呢样嘢嘅时候，连我自己觉得好困难，再俾人放大呢个伤口，我就会开始质疑自己……”

认KOL收入可观　月入6位数：唔系秘密！

虽然KOL这条路并不易行，但的确可以有好可观的收入。Jenn回想起当初第一份Job时称：“都唔平㗎，拍一条片有6000蚊，当然而家唔同咗啦。（很多流传说KOL啲钱好易赚，最少月入6位数？）其实都唔系秘密，有嘅。但当然，我觉得系好彩……大家见到我成日上载吃喝玩乐嘅嘢，但其实呢行你要好勤力好勤力。”

点撃下图了解KOL私密生活！

为品牌放弃护肤品市场：已经放弃𠮶边嘅收入

尽管钱易赚，但Jenn为了品牌的生意亦推了不少工作，她指：“好肉赤㗎，我成日都话一个牌子好唔好用，同佢卖唔卖广告系冇冲突。但有啲客户比较死板或者要控制我讲嘢，令到件事出嚟效果唔好，我就宁愿唔接。因为讲紧系关乎我嘅声誉同埋我同朋友有生意嘅时候，更加要顾住另一边，所以都系几大嘅责任。（有咩系唔接？）唔接嘅原因好多，譬如如果𠮶样嘢我真系唔用，仲有啲成份麻麻地㖞，咁就冇谓接。同埋我真系唔想成个Page每日都揸住唔同嘅产品。另外，我而家有自己嘅品牌，而我都对自己产品好有信心，同埋认真我已经转晒自己啲嘢嚟用，除非个护肤品牌好好用，如果唔系我已经可以放弃𠮶边嘅收入。”

对进军娱乐圈零兴趣：自己个样唔系好靓

至于有近年有KOL亦参加选美，进军娱乐圈，但Jenn就表示零兴趣：“曾经都有拍戏Casting或者有公司想签，但我自己主要唔系想做幕前，我唔系特别钟意演出，都唔系特别对自己个样有自信。纯粹系我好钟意拍片，好钟意剪片亦都钟意化妆，就系钟意分享我钟意嘅嘢，但问我想唔想做幕前就真系唔会。（唔考虑参加香港小姐？）我唔钟意呀，同埋我觉得自己个样唔系好靓，要靓嘅女仔大把喇！”

遭疯狂粉丝跟踪吓餐死：跟埋我去法国！

即使Jenn志不在幕前，但她亦难逃疯狂粉丝的跟踪：“一开始系好惊，因为佢真系会跟埋我去周游列国，跟埋我去法国，我直情去咗法国报警……你越惊𠮶啲人嘅心理就系……有反应㖞！我觉得最紧要唔好惊，自己出入当然要小心啲，原来好多女仔都有呢个问题，大家都应该要小心啲。（最后点样告一段落？）唔好理佢，我试过闹喇，报警喇，咩都试过但都做唔到啲咩，唯有唔好理。（佢有冇做过咩伤害你？）跟喇，不断送嘢，送去我成日去嘅地方，即系Café、Gym或者我去唔同地方公干都会跟，我直情唔想提佢，我觉得越提佢佢就越开心，我要话畀佢知佢一啲都唔重要，唔想畀佢知佢影响到我。”