冯盈盈与十优医生男友结束四年情　回顾二人放闪情路

冯盈盈参选2016年度港姐夺冠入行，喺TVB发展一帆风顺可谓扶摇直上，担任《#后生仔倾吓偈》主持，大胆言论被封为“性博士”，但其实私底下嘅佢系绝世好女友。有别于其他新人收埋恋情，盈盈自选美时已经公开承认有个医生男友Martin（宝宝），外界一早睇好佢地随时拉埋天窗，估唔到最终分手收场。睇返呢几年冯盈盈曾多次疯狂放闪，依家睇返转头更不胜唏嘘。

患难见真情

冯盈盈曾经喺访问中透露，去年录紧节目小休时发现miss call，知道妈妈突然心脏病发入院：“原来细佬同妈咪出去食饭途中心脏病发入院，仲要入深切治疗部，可能有血管栓塞需要通波仔。”感到十分徬徨嘅盈盈，唯有打畀宝宝，原来佢已经出发去照顾冯家上下。盈盈感动表示：“𠮶一刻我好内疚......宝宝除咗平时照顾我之外，连我屋企发生事，都是由佢嚟照顾及安顿，好彩身边有佢。”

夹钱买楼同居

唔少香港人以置业上楼为目标，今年Martin以个人名义置业，盈盈瞒着家人出钱帮手俾首付，而且层楼仲无落名，全属Martin所有。盈盈称：“反正我又不是畀晒全部，只是一部份，始终香港买楼真系好贵，即使比较高收入人士，首次置业都好困难，作为女朋友都希望可以帮吓忙。”其后佢亦不时喺节目透露装修及同居生活情况，直认不讳指本身谂住同居系可以过下温馨二人世界，点知而家每日就系洗衫、吸尘、洗衫无限loop。“做到好攰，一上床谂住倾吓偈，点知宝宝已经瞓咗。”

公开肉麻互动放闪

盈盈主持《#后生仔倾吓偈》时，几乎隔两集就会提起男友，曾经有一集以“怪癖”为主题，盈盈透露：“我同男朋友最亲密的活动就系挤粉刺，佢真系好脏，好多宝藏可以乱挤……”情侣之间其实不时都有呢啲互动，但冯盈盈就将此举动升级到“抆鼻毛”，唔系修剪而且直接用手抆，她更兴奋表示要抆到连毛囊一拼拔起才算是成功……又再自爆自己本身好钟意闲男友胳肋底，二人相处真系去到赤裸裸嘅程度……

视对方为结婚对象

报名参选港姐时二人已经拍紧拖，盈盈入行获男友无限量支持，Martin不单止读传统名校喇沙书院，更系2005年会考十优状元，现职玛丽医院医生。佢嘅EQ相当高，就算盈盈遇上工作有压力发脾气，都甘愿做佢嘅出气袋。即使二人工作关系生活作息南辕北辙，都会互相迁就争取时间拍拖。盈盈早前更喺《娱乐大家》中，以“老公”称呼男友，可惜，此情最终未能走到尽头。