代莲曦丹美性感亮相澳门电影节　披自家品牌战衣做生招牌

参选2016年港姐入行，现转为发展个人潮牌嘅代莲曦丹美（Daisy），日前去到澳门氹仔，出席第十一届“澳门国际电影节”活动，身为时尚达人嘅佢著上珠片低胸晚装现身，既性感又高贵，走在红地毯上非常亮眼。

今次 Daisy 以嘉宾身份获邀出席，佢话自己首次喺澳门参加电影节，大开眼界：“我当睇 show 咁，都真系好热闹好多人，所以特登着自己品牌嘅晚装嚟做吓生招牌。其实除咗 fashion 之外，我系一个演员嚟架，我好热爱演戏，亦有留意唔同嘅影展，但我入行资历仲浅，希望下次可以有机会睇到香港电影金像奖。”Daisy喺澳门期间刚好做冬，当晚同朋友食餐美味嘅地道葡国餐做节。