【入住请敲门4．专访】MIRROR闯猛鬼酒店吓死：一房都系婴儿灵体

ViuTV灵探节目《入住请敲门》拍至第三季，除两位元老主持林婷、莫竣名之外，今次仲加入MIRROR成员卢瀚霆（Anson Lo）及邱士缙（Stanley）。出发前被花姐睇死会中招、老窦怕佢会带啲唔干净嘢返屋企嘅Anson，结果不负众望，开工第一晚就“被敲门”！

同好多观众一样，Anson同Stanley都曾经质疑《入住》嘅真假性，甚至喺开拍前特地向莫竣名求证。而Anson得到嘅回复系：“佢好肯定话无造假，仲话总之有咩都唔好惊，因为so far都未试过害人……”就系咁，二人怀著兴奋嘅心情，分别去到日本同台湾拍摄。结果Anson第一晚去到日本时，被安排入住四人房，并挑战“都市传说”。他说：“我将啲糖铺满晒喺张床，用意系招惹bb灵体，但呢个举动我当晚开facebook live时无讲。到我洗澡后，听到露台系咁有咯咯声，既唔系风声又唔会系工作人员爬上嚟玩我，与此同时，见到好多网友留言话窗外有一班小朋友入去问我拎糖，又话已经有只女鬼企咗系我旁边，真系好惊。我仲懒醒将啲糖放喺枕头，谂住就摄影机，后尾真系太惊又太淆底，将啲糖放晒落地先咁瞓。”

惊魂未定，大队转酒店后，Anson虽然获安排同莫竣名同房，但并未有减少佢嘅心理阴影……“𠮶晚我哋要喺房开长伞，因为咁会较易招惹灵体。准备瞓嘅时候，突然见到粒细蓝光闪过，有谂过系摄影机，但机灯系黄色，粒蓝光闪到第三次时真系好怯，突然间feel到有人笃咗我一下，但明明莫竣名瞓到死猪咁!当下都有谂过叫醒佢……”到底边Anson被咩笃呢?相信连佢都解释唔到，他表示或者系因为当时的心理状况，令所有感观都被放。“师傅有话普通级数嘅灵体其实唔会掂到人，如果掂到就真系好高level。”咁到底Anson系好彩定唔好彩?!

至于Stanley，佢话第一日喺台湾嘅灵探点开工时，不时都听到有“节节声”，直到工作人员打灯时，才发现墙角有近60多只蝙蝠，当下嘅感觉系：“原来呢个节目系咁真实。”众人之后继续灵探，由于曾经有YouTuber喺同一地方使用“磁场探测机”得到回应， Stanley同莫竣名为此进行测试。“系有突然感觉到转咗频道，但呢个唔系最恐怖，最恐怖系问到有无发生过命案时，最入𠮶个厕格突然有一声巨响，好似系跌咗嘢咁，当下我哋第一个反应系冲出外面……”冷静过后，Stanley同莫竣名再次进行女厕，当然系咩都见唔到，但手上嘅磁场探测机就不停发出沙沙声……

虽然整个拍摄过程都系惊同好惊，但Stanley同Anson都话如果有机会的话，都一定会参与，问到如果有得拣的话，想拉埋边位MIRROR成员入局，两位就突然非常认真咁考虑……Anson表示：“为求有好笑效果我应该会同Eden(吕爵安)去，因为佢真系咩都惊一餐，平时睇鬼片，真系要拉佢先肯入场。”至于Stanley就话会揾Tiger(邱傲然)。“因为好多时惊系受拍档所影响，平时Tiger唔多讲嘢，所以好想知到底佢惊嘅时候会系点。”

娱乐圈年度“最Sweet新闻”名单有喇！即到《01最赏睇娱乐大奖》投票，仲可以参加劲抽双重奖，随时赢得终极大奖旗舰手机11 Pro Max、Dyson风筒等。