【潮流日常】39岁姚子羚冻龄有术　公开23吋黄蜂腰Keep fit秘方

11月21日系姚子羚39岁生日，喺佢身上完全睇唔到岁月痕迹，从入行时于剧集《当四叶草碰上剑尖时》，饰演乐天学生蓝雪文，到今年拍《黄金有罪》再戴上眼镜，网友都惊叹佢16年来完全无变，究竟佢有咩冻龄妙法？

茹素加足够汤水

做艺人特别喺TVB拍剧，日夜颠倒休息唔够，Elaine之前拍剧仲要去到新疆沙漠拍摄外景受风沙摧残，属于敏感肌嘅佢，除咗勤用无添加护肤品，更著重食疗保养。

近年改为茹素嘅Elaine，坦言食多咗蔬菜排出更多体内毒素，令皮肤状态好咗好多。而且工作再忙佢都会抽时间煲素汤滋润一下，好似冬菇莲藕素汤就系佢至爱之一，夏天又会煲竹庶茅根清热润肺，仲hashtag提醒大家“女人一定要饮汤水”

勤于运动

胡杏儿曾经喺《胡说八道真情假期》中公开表示，“胡说八道会”众多姊妹之中，身材最好绝对系姚子羚。Elaine既有长腿上围亦丰满，仲有23吋纤腰令女士们相当羡慕。睇返佢嘅IG真系好勤力做运动，除咗定时到健身室报到，仲不时会去行山跑步踩单车，即使25岁后新陈代谢减慢都无有怕﹗

保持心境开朗

Elaine人缘相当唔错，除咗胡说八道会一班好姐妹，同佢合作过嘅拍档好多都成为好友。人地话拍拖时嘅女人特别容光焕发，但更聪明嘅系好似Elaine咁，无论拍紧拖定单身，最重要识得爱钖自己。Elaine近年从兴趣发展副业，推出联乘饰物；放假除咗运动，会相约好友外游放松心情；仲经常去做宠物义工，连生日都作饰物义卖捐款到动物机构。既乐观又有爱心，𠮶种靓真系由内散发出嚟。