【任噏乱评】台庆show无新意无诚意　TVB究竟仲有冇心庆祝生日？

TVB台庆（2019年改名为《珍惜香港发放娱乐TVB 52 年》）在昨日“有喜无险”地完成，点解话有惊？因为早前网民曾发起在台庆当日到TVB门口示威，令到TVB在早一天已经预录定节目，以便当日万一真系有事发事，都依然可以播出录影，继续庆生！

不过，昨日未见有示威者到场，而TVB内更是人迹罕至，连艺人都唔见有！所以继续播出早一日的录影节目，“有惊无险”的跨过52岁生日。

翻炒自己节目内容

讲返个节目，相信不少观众睇完成个节目之后，都会觉得入面啲环节熟口熟面，除咗参考《娱乐大家》玩真假谎言，仲有港姐入面嘅快问快答，空中瑜伽的表演，不停将之前已经做过的节目再做一次，见到王君馨、黎诺懿同黄智雯跳舞，仲以为睇紧跳舞比赛。其中有一part，黄翠如、洪永城、萧正楠和曹永廉四人出现的确有几个笑位，不过都系玩有味笑话，略嫌低级。至于一开头一众艺人咪咀唱歌就冇特别，最后周柏豪菊梓乔压轴献唱亦没惊喜，反而星梦派出菊梓乔而不是连诗雅，证明地位还是有差别。

即睇返昨晚的表演画面：

【台庆2019】众艺人战衣率先睇 冯盈盈真空现身好惊喜

【收视滞后报告】从节目巡礼分析 TVB要重执昔日光辉不能再呆等​

艺员缺乏时间排练

大家都知道，台庆节目一直都是以表演节目为主轴，以前有阿姐唱《热咖啡》，肥姐踩鸡飞，华仔心口碎大石，吴刚师傅吞炭，梁朝伟用牙拉动载满艺员的小型货车，总之听落都知系劲嘢，而家啲艺人唔系唔落力，不过真系忙到冇时间啰，玩空中呼拉圈的张曦雯都话自己冇时间练，其实冇时间练，表演又点会好睇呢？而且，今年嘅表演问题甚至唔系落系艺人度，而系度桥！表演节目炒冷饭，将以前嘅重新搬过嚟做一次，冇新意得嚟亦冇诚意，咁不如唔好表演，谂吓其他节目好过喇！

取消才艺表演环节

其实上年有多年一直有玩嘅趣剧环节，今年连呢个都冇埋，善于搞气氛嘅农夫又冇影，得返Do姐一个加上汪阿姐，气氛只会系严肃，所以成个节目的确冇咗𠮶阵轻松搞笑嘅感觉。作为一个帮历史悠久的TVB庆祝52岁生日的节目，好像临时临急堆砌出嚟绝对令粉丝相当失望同难过，话晒都系一年一次，畀啲诚意出嚟整得好好睇睇唔系更好咩？唔通用旧桥观众会睇唔出咩？突然谂起昨日台庆骚最后一part，就系最后抽大奖𠮶四只公仔，有两只狗仔唔听主人话，走埋一齐面对面唔肯行前，竟然系成晚睇得最会心微笑嘅一刻。

向经典表演致敬

节目效果其实除了靠艺人，仲要靠背后一群幕后制作去度桥，如果一直炒冷饭，其实人人都谂到。亚洲近年娱乐圈极速上位的韩国，都会识搞个艺人运动会，畀观众见吓艺人嘅另一面，点解TVB唔谂吓呢方面呢？唔使要艺人嚟嚟去去都系表演自家最强嘅项目，一年表演几次，就算几劲都闷喇，系咩？除咗揾啲新意思，其实重温经典都系一个好玩法，叫王浩信用牙拉车，叫细细粒踩鸡蛋，叫马国明心口碎大石，有诚意得嚟收视一定爆！再唔系，如果唔可以年年都谂到啲新意出嚟，其实唔使年年搞，或者五年、十年先搞一次，储足力量精精彩彩做一次好骚，唔系仲好咩？