【早霸王】女听众称同表白对象好夹　森美揭人夫真相后静过太空　

森美、小仪、Marco主持《早霸王》嘅“你知道唔知道有人挂住你”撮合过唔少情侣，女听众Ada今日打去节目，表示想同一位相识多年嘅大学同学示爱。“一直都好friend，不过大家太受欢迎所以无一齐。最近突然多咗联络，讲返以前嘅开心同sweet嘢，所以觉得唔想再错过。”
 

由多年好多变拖友嘅个案，都唔系未试过喺《早霸王》出现。当森美问到“有无暧昧过?”嘅时候，Ada就话试过曾经同朋友饮酒饮到好醉，友人于是夜半急call呢位心仪对象出嚟照顾Ada，听落好似都有少少sweet。之后问到“有无单独出街先”，Ada话之前同对方一齐睇林海峰，虽然森美同Marco都觉得揾朋友睇骚好正常，但Ada就坚持“所以觉得同佢好夹”，并强调早前同对方食生日饭，但一问到是否两个人的约会时，Ada就话系“三人行”。森美认为如果男方对Ada有意思的话，点都会造就到二人世界，甚至指出“男仔同女仔朋友都可以好好倾，如果真系钟意你，佢一定会借啲意约你行山、食饭。”

就咁听Ada讲，都似系佢单方面发展，直到森美问“佢有无问你点解无男朋友”时，Ada话无，但对方就曾经笑佢成日钟意埋啲核突嘢，森美追问：“咁佢有无话试下我呢啲型嘢？”Ada一句“佢成日讲㗎！”即时令成件事出现曙光！森美即时打俾Ada嘅表白对象Willy，并表示：“我哋系感情节目，系命运的安排打比你，爱情方面你寂唔寂寞？”Willy一而再表示“唔寂寞”，仲话“我有好多爱，因为我有个老婆啰......”录音室又再一次静过上太空……得知Willy已经结婚4年之后，森美当然唔容许Ada呢个表白机会发生。电话次后再次接通Ada后，森美第一时间问佢系未Willy老婆，但Ada就强烈否认，当森美问到“你知唔知佢结咗婚”时，Ada即紧张追问“佢话咩呀？”，当听到森美表示：“佢结左婚， 4年㖞”时，Ada发出一阵唔知笑定喊嘅声音……然后……就没有然后了。既然系相识多年嘅朋友，Ada理应会知道对方已婚4年多，如此明目张胆想向人夫表白，难怪森美会觉得被玩。