【嫁到这世界边端3】跟工程师老公四海为家　Karen感寂寞不禁落泪

人系群体动物，有家人朋友嘅爱同支持，又有边个喜欢孤单一个？TVB真人骚《嫁到这世界边端3》，陈贝儿同摄制队走访多地，访问一班为爱情飘洋过海到异乡定居嘅人妻。Karen同意大利老公Nico一齐之后四海为家，即使二人感情再好，每当孤独感觉涌上心头，Karen都不禁黯然：“去得愈多地方好似愈少朋友，我系攰嘅。”

四年几前，任职工程师嘅Nico嚟到香港参与沙中线隧道挖掘工程，二人于聚会认识再坠入爱海。由于Nico嘅工作，就系走到世界各地掘隧道，婚后Karen决定离开香港，跟随老公浪迹天涯居无定所。北京，阿根廷，最后去到埃及，喺一个三线城市ISMAILIA定居，替当地政府兴建隧道。

去到一个新地方仲要受到歧视，令Karen非常无助：“有一次喺超市买𩠌，见到个收银都系移民，佢见到每一个客人都会打招呼。但轮到我俾钱时就瞪住我唔出声，点解？系咪因为我肤色唔同，就连一个移民入境嘅收银都要岐视我。究竟一个曾经喺香港以事业为重，一个非常独立嘅香港女仔，点解嚟到一个完全无办法沟通嘅地方，觉得自己好废好无用。”

有著香港女仔嘅独立，每到一个新地方，Karen都努力学习当地语言，参加兴趣班认识朋友，但因为Nico嘅工作关系，令Karen愈来愈迷茫：“每当我开始适应点知就要走啦，呢个过程不断重复。之前喺北京学瑜珈、去到阿根廷学西班牙文，刚识到朋友就要离开。我都好挂住我啲朋友。去得愈多地方好似愈少朋友。”讲到呢度Karen不禁喺镜头前落泪。

每当难受时KAREN都唔会同老公呻，无谓令佢觉得难受，不过人在异乡老公又忙又无朋友，Karen亦的确怀疑过自己嘅决定：“有时真系会觉得好孤单，老公返工好忙，有时真系早午晚三餐都系自己食，有时直情唔想食。有一刻怀疑过自己嘅决定，曾经同老公讲收到OFFER香港有工作想我返去，佢觉得好大件事，问我：你跟住我四处飘泊系咪觉得攰啦？我系攰嘅，但如果要条件式选择，想分享老公事业收镬但又唔想一齐经历为事业嘅付出，会觉得自己好自私。”