【晚吹】大台PA爆料：有艺人接job搞到迟到，要停厂三个钟等佢

ViuTV节目近年不时揾嚟曾在大台工作的艺人合作，最新一集《晚吹- 又要威又要戴头盔》揾嚟5位曾在大台工作的PA分享工作辛酸史。

到底PA嘅工作范畴系咩呢?佢哋就以“厂嘅一条毛都关你事”去总括，当连一条毛都关事时，咁工时又会系点呢？其中一位表示:“剧组嚟讲系十小时起跳”。除有试过两星期只能够做到返屋企冲凉再开工之外，亦有试过一个月返朝九收零二。“我哋过250小时就要MARK钟补OT钱，试过最高纪录系400个钟，但人工唔会因为咁而double，可能都都系多几百一千，连的士钱都蚀埋。”如果以400小时去计算，即系一个月唔休假咁每日返足13小时……“最辛苦系外景接厂景由早上7点一直到下一个早上，当你准备瞓𠮶阵，其他部门开工，会打嚟揾你对单……” 

5位PA都不约而同表示“俾人闹”已经系工作范畴之一。“PA有时会帮艺人企位，有演员试完位后去补妆，我企佢𠮶位帮摄影师度位，点知个演员突然好大声咁话我企晒，佢表现得好嬲，仲叫我行开话佢自己企返，之后武指有同我讲话我𠮶位其实系啱，可能个演员见我新人，所以想下马威。”另一位PA嘉宾亦透露有前辈级艺人回巢，但拍摄时完全唔听导演讲，自己做自己一样。“佢比你感觉系本来唔想接，因为某啲关系所以先要拍。”

大台艺人不时都会接job揾外快，但PA嘉宾透露有艺人为揾外快要迟到开厂。“套剧因为有老人家，所以都会mark早啲开工，但某演员因为出面工作而迟咗，要全世界停厂三个几小时等佢。过几时之后，见到某演员喺mark呻，话PA安排嘅时间好差搞到佢两头唔到岸，但其实个期系佢自己俾我哋。”